Artesanía de Galicia busca novas oportunidades de negocio na feira Formex de Estocolmo

A Consellería de Economía, Emprego e Industria impulsa a comercialización e a promoción de Artesanía de Galicia no mercado nórdico na feira de decoración Formex, que se celebra en Estocolmo ata o vindeiro sábado, 21 de xaneiro, unha iniciativa coa que se busca abrir novas canles de distribución para o produto artesanal galego.

A Fundación Centro Galego da Artesanía e do Deseño presenta na capital sueca unha nova colección de pezas de 36 obradoiros galegos, coa que se ofrece unha proposta para crear ambientes baseados no produto artesán e nos que a artesanía tradicional combina con produtos máis contemporáneos.

A prata, a iluminación, o téxtil e o coiro únense á cerámica, a cestería tradicional, a cestería téxtil, a olería tradicional ou as pezas utilitarias elaboradas en madeira na escolma que representa o produto artesán galego en Formex, feira na que Artesanía de Galicia participa desde o ano 2013.

Formex está considerada unha das feiras profesionais de decoración de referencia do deseño escandinavo e celébrase en dúas edicións anuais, xaneiro e agosto. Trátase dunha oportunidade única para a reunión de axentes, importadores, deseñadores, produtores e compradores de deseño interior e da industria de agasallos, unha porta aberta a un mercado internacional no que o produto artesán galego está a introducirse.

Entre as novidades da escolma que Artesanía de Galicia presenta nesta edición atópanse as pezas textís do obradoiro Belategui Regueiro (Cambre), a olería de Pepe Otero (A Coruña), os complementos de coiro de Corzo Artesanía (Arzúa), os coitelos dos obradoiros artesanais do ferro de Riotorto MAF Artesanía e Jomaca, os collage de Nena Ventura (A Coruña), as pezas cerámicas de Ojea Studio (Vigo) e Mágicos Gagarín (Cea), e os traballos en madeira de Lorenzo Design (Santiago de Compostela).

Outros obradoiros que xa estiveron presentes en edicións anteriores da feira Formex tamén presentarán novas liñas de produto como é o caso do coiro da man do obradoiro Coiraxe (Vigo), Jatafarta (Santiago de Compostela), Miolos Design (Mourente) e Cabuxa (Tui). Inclúense tamén as apostas pola iluminación de Pedeeme de Campañó, os coitelos do obradoiro do ferro Celso Núñez Ferreiro (A Fonsagrada) ou o téxtil de Artefíos (A Coruña).

A porcelana estará representada por pezas de Marta Armada (Vigo), Verónica Moar (A Coruña), Como Cuando (Vigo), e o finalista do Premio Artesanía de Galicia 2016 Víctor Ares (A Coruña). A cerámica que participa no stand está elaborada polos talleres de Laura Delgado Cerámica (Cambre), Unzueta Cerámica (Brión) e os recentes gañadores da Bolsa Eloy Gesto dos Premios de Artesanía de Galicia 2016 Madriguera Workshop (Ferrol).

En canto á olería, están representados os centros de olería tradicional galega de Niñodaguia, coas pezas de Alfarería Agustín (Xunqueira de Espadanedo), Gundivós, co traballo de Rectoral de Gundivós (Sober) e Buño, coas pezas de olería contemporánea baseadas na ampla tradición oleira desta localidade de Malpica de Bergantiños a partir do traballo de Alfarería Aparicio e Alfarería Rulo que presentan tamén novos produtos.

No stand comparten espazo os cestos tradicionais de Antonio Suárez Davila (Vigo) e a cestería contemporánea con materiais téxtiles elaborada por Idoia Cuesta (Outeiro de Rei). En canto á madeira, os obradoiros que levan as súas pezas a Formex son Armaior (Quiroga), Artesanía Ferradáns (A Estrada), Atalanta (A Estrada) e Elena Ferro (Merza), Cunqueiro (Palas de Rei).

Tamén están presentes nesta nova edición o obradoiro de figuras de pan de Jorge Bellón de San Andrés de Teixido, e a prata está representada polas exquisitas pezas dos recén nomeados gañadores do Premio Artesanía de Galicia 2016, Noroeste Obradoiro de Santiago de Compostela.

A participación de Artesanía de Galicia na feira Formex de Estocolmo enmárcase na folla de ruta impulsada pola Consellería de Economía, Emprego e Industria coa que se incide na competitividade empresarial e a potenciación do talento galego. A comercialización e a promoción do produto artesán galego a través da consolidación da marca Artesanía de Galicia nos diferentes mercados constitúe unha das liñas estratéxicas da Xunta en materia de artesanía.