O proxecto ‘A permanencia do invisible’ que reflexiona sobre o pasado e presente de Bueu xa está exposto

Inauguración da mostra

Fai un ano comezou a madurar en Bueu un proxecto de reflexión sobre as transformacións experimentadas en Bueu co paso do tempo. Este é o punto de inicio da exposición que esta semana se pode ver na sala Domínguez Búa de Bueu, na que artistas de catro disciplinas poñen o seu gran de area para dar conta de que algo está a mudar no noso pobo. Xaime Toxo escribe os cambios a través das súas poesías e relatos; Antón Sobral, ponlle a pintura; María G. Méndez, os debuxos, e Anxo Cabada, as fotografías.

Na inauguración desta mostra, que tivo lugar este luns, estivo presente o concelleiro de cultura, Carlos Eirea, quen comezou destacando a importancia destes eventos nos que “conflúen as diversas artes para crear reflexión”. Xaime Toxo aproveitou para falar dos obxectivos deste proxecto que nace da man de catro persoas vinculadas en maior ou menor medida coa vila buenense, e que quixeron utilizar a obra de arte como mecanismo de pensar.

Antón Sobral anunciou os diversos actos que se organizan durante esta semana dedicada á arte e á natureza, tales como a sesión literario – musical “Un mar máis alto có ceo”, que terá lugar este martes ás 21 horas no Museo Massó; a presentación do libro de Xaime Toxo, Protexer o invisible, este xoves ás 20 horas na sala Domínguez Búa; e o I Encontro da Arte e da Natureza, que este sábado entre as 11 e as 20 horas impregnará Cabo Udra de pensamentos e obras sobre a arte de andar.

Nun mundo no que a rutina parece querer esmagar as nosas conciencias, o fotógrafo Anxo Cabada fala do pasado coas súas imaxes, nas que propón un “pase ao íntimo por Bueu”. A arquitecta María G. Méndez trata os efectos do paso de tempo na paisaxe e a fronte marítima, facendo uso do debuxo como forma de interpretación do mundo que a rodea.