Esgos acolle un campamento Scout de Nadal

O Grupo Scout ILEX 959, de Ourense, e o Grupo Scout Ferrol 19, da cidade coruñesa, xuntaranse en Vilar de Ordelles, Esgos, para desenvolver seu campamento de Nadal entre os días 26 e 29 buscando o contacto coa Natureza na estupenda contorna das terras da Ribeira Sacra. Nesta actividade aproximadamente 30 rapaces e rapazas, e seus monitores/as voluntarios/as, ocuparán o Albergue de Vilar de Ordelles, que o Concello de Esgos lles facilita xenerosamente para estes catro días de aventura, e que será a base e lugar de pernocta para os pequenos aventureiros de entre 8 e 13 anos. As actividades buscarán o máximo contacto coa Natureza e haberá rutas, actividades de orientación, xogos, gymkhanas, teatro, xogos de pistas, cancións, etc.

Pero sobre todo haberá diversión, convivencia e tamén corresponsabilidade, onde os e as participantes ocuparanse (de acordo as súa idade e capacidades) de tarefas básicas do campamento, como facer comidas, fregar a louza, ocuparse da limpeza da instalación, pois o método educativo que empregamos os scouts busca que os nenos e nenas sexan cada vez máis autónomos e responsables. Calquera rapaz/a de Ourense e a súa contorna, con idade entre os 8 e os 13 anos pode aínda inscribirse e coñecer como é a aventura scout. A inscrición estará aberta, a través dun formulario da nosa páxina web, ata as 14:00 horas do luns día 21 de decembro cun custe de 49 euros que inclúe seguros, alimentación, aloxamento e actividades.

O Grupos Scout ILEX 959, de carácter laico, é de recente constitución e leva desenvolvendo a súa acción educativa dende comezos de outubro deste ano con actividades semanais que desenvolve cada sábado pola mañá no Espazo Xove (Casa da Xuventude) de Ourense e conta xa con unha quincena de rapazas e rapazas participantes. O Grupo Ferrol 19 é o grupo scout decano en Galicia, contando con máis de 50 anos de historia, polo que o campamento será unha estupenda oportunidade para trasladar parte da súa experiencia ao grupo ourensá recentemente constituído. Ambos grupos forman parte da federación scout ASDE –Scouts de Galicia.