A concelleira do PSOE de Soutomaior lamenta aclara que non pretendía xustificar a violencia

Verónica Montero, a concelleira do PSOE en Soutomaior (Pontevedra) que ironizó a través das redes sociais coa agresión sufrida polo candidato do PP á reelección, Mariano Rajoy, lamentou o “malentendido” que se xerou e aclarou que non pretendía “xustificar a violencia”.

Así o indicaron fontes socialistas, que recalcaron que si “condena a agresión” e que lamenta que alguén se sentira “ferido” polas súas manifestacións a través de Twitter. Ademais, puntualizaron que o peche da súa conta responde ás “ameazas” que recibiu tras os seus comentarios sobre o presidente.

Tamén recordaron que ela mesma foi obxecto de “pintadas” fronte á súa vivenda con mensaxes insultantes sen que o concello, liderado polo PP, procedera á súa limpeza máis dun ano despois.

Montero publicou no seu perfil de Twitter un total de tres mensaxes nas que dá a súa opinión sobre os feitos acaecidos o mércores en Pontevedra. No primeiro, puxo por escrito que o presidente “non vén a Pontevedra máis que en vacacións e eleccións e pretende despois de catro anos de recortes que se lle aplauda? Veña xa”.

A continuación, abundou: “A moita xente parécelle lamentable o que lle pasou a Rajoy… E a min paréceme lamentable que poida volver ser presidente alguén como el”. Na súa última publicación antes de pechar a súa conta, a socialista agregou: “Amigo Mariano… Comprendemos o teu enfado… Pero… se forte… Quédanche dous días e o 20 xa te vas”.