Conde visita a empresa porriñesa Darlim no seu 30º aniversario

Conde na visita a Darlim

O conselleiro de Economía e Industria, Francisco Conde, salientou hoxe á empresa porriñesa Darlim no seu 30º aniversario como modelo das pemes familiares galegas capaces de saír a outros mercados. Conde participou nos actos de celebración do cabodano da compañía, durante o que se anunciou a remuda do director xeral Indalecio Cuevas, que deixa o cargo en mans do seu fillo, Saúl Cuevas.

Conde subliñou a importancia nas empresas familiares dos valores “transmitidos de xeración en xeración”, que son claves, sinalou, para contar cun “liderado sólido, de confianza”. Neste senso, agradeceu o pulo emprendedor de Indalecio Cuevas e subliñou os valores compartidos do novo director xeral, que asume a tarefa de consolidar a posición da empresa á vangarda do sector da limpeza en Galicia.

O conselleiro resaltou os valores de talento, sacrificio, excelencia, innovación e tesón como chaves do éxito da empresa e, con ela, do tecido de pemes familiares exportadoras galegas. Neste senso, lembrou a participación de Darlim no mellor trienio exportador da historia de Galicia, en tanto que desde 2103 a comunidade está a bater os seus récords históricos de exportacións, balanza comercial e empresas exportadoras regulares. Darlim vén de expandirse aos mercados de Colombia e Guinea Ecuatorial, dixo Conde, amosando a capacidade das pemes para acadar o éxito noutros continentes.

“Aquelas empresas que son quen de superar os 30 anos teñen amosado un ADN competitivo capaz de superar calquera obstáculo”, sinalou o conselleiro. “Nun mercado que é o mundo, e cunha competencia cada vez máis dura”, Conde subliñou a capacidade desta peme familiar para adaptarse aos cambios económicos e tecnolóxicos, sumando 4.500 clientes, entre eles a Armada Española.

Conde apuntou, neste senso, que Darlim é mostra de que “se queremos progresar debemos crecer sobre uns principios compartidos de xeración en xeración, sobre un saber adquirido que misture o mellor do pasado coa visión de futuro, e sobre a confianza de que un equipo unido é a mellor garantía para abordar os retos dos tempos que están por vir”.