O Campo de Regatas David Cal en Verducido acollerá os campionatos galegos de infantís e cadetes

O Campo de Regatas David Cal en Verducido acollerá o próximo fin de semana os campionatos galegos de infantís e cadetes, tanto na modalidade de kaiak como de canoa. Máis de seiscentos padexeiros daranse cita para disputar ambas as competicións. O sábado estará destinada aos cadetes e o domingo aos infantís.

A partir das nove da mañá do sábado, os cadetes iniciarán a súa participación no Campionato Galego, unha das probas máis importantes da tempada. Disputarase sobre a distancia de 1.000, 500 e 200 metros. A competición terminará pola tarde e nas regatas están inscritos todos os clubs galegos.

O domingo será a quenda dos infantís. A distancia será de 3.000 metros, tanto para canoa como para kaiak. Será unha xornada só matinal e están inscritos 324 padexeiros, tanto na categoría A como na B.

O Campo de Regatas David Cal en Verducido acollerá a próxima semana o Campionato de España de verán, unha competición na que estarán presentes todos os equipos a nivel nacional. As regatas serán decisivas para coñecer tamén o gañador da liga de Pista Olímpica Hernando Calleja, a Copa do Rei e da Raíña. O Kaiak Tudense parte como un dos favoritos para lograr a vitoria.