Soutomaior convoca o concurso literario “Cerbas para…comunicar”

Un ano máis, e xa van oito, as mellores plumas novas de Soutomaior teñen ocasión de mostrar a súa valía no certame literario “Verbas para…comunicar”. Organizado pola Concellería de Xuventude do Concello de Soutomaior, e con motivo da celebración do Día das Letras Galegas, este concurso pretende potenciar o uso da lingua galega, o seu gran valor literario e reafirmar a súa expresión como lingua próxima, útil e moderna. Ata o próximo 30 de abril, os mozos menores de 18 anos empadroados en Soutomaior poderán presentar unhas propostas coas que optarán a premios como unha tablet, unha cámara de fotos ou un libro electrónico, entre outros.

Un texto breve, persoal. Que transmita unha idea, un sentimento ou exprese unha opinión. Unha pequena ventá para lanzar unha mensaxe, para comunicarse e compartir cos demais a nosa pequena visión do mundo. Unha carta, un poema ou unha reflexión, non hai temática, formato ou estilo definido, só un límite de doce liñas de pura arte literaria. As redaccións presentadas a concurso valoraranse tendo en conta a idade dos autores e en función da súa calidade, presentación, orixinalidade, riqueza de vocabulario e grao de elaboración.

A competición literaria establece dúas categorías en función dos anos dos participantes. A primeira para os escritores de 12 a 14, e a segunda para aqueles de 15 a 18. Ambas as dúas contarán con premios para os seis mellores traballos entre os que figuran recompensas como tablets, dvd ´ s portátiles, libros electrónicos, cámaras fotográficas, impresoras ou marcos dixitais. A entrega de premios realizarase no mes de maio nos colexios e a continuación procederase á lectura pública dos textos premiados ademais de realizar un sorteo entre todos os alumnos participantes dun Dicionario de Lingua Galega.

Entre os principais obxectivos do certame é a intención de favorecer a participación da xuventude na creación de textos orixinais que expresen e comuniquen o que a xuventude sente, pensa ou quere dicir outras persoas, entidades,… coa finalidade de comunicar. Para iso, os requisitos para participar son simples, ser menor de 18 anos e estar empadroado no Concello de Soutomaior ou ben estar matriculado nalgún curso de ESO ou Bacharelato nos colexios Manuel Padín Truiteiro e Santiago Apóstolo.

Os traballos deberán facerse chegar ás oficinas da OMIX, no edificio Multiusos de Arcade, antes das 20:30 horas do próximo día 30 de abril. A entrega farase en sobre pechado de xeito individual ou en grupo a través dos centros escolares colaboradores. É de vital importancia que todas as obras conten cos datos persoais dos autores (nome e apelidos, idade e categoría, lugar de residencia e teléfono de contacto) nun folio separado do traballo presentado para garantir o anonimato deste durante todo o proceso de valoración. As bases do concurso encóntranse na web do Concello de Soutomaior, na sección da Concellería de Xuventude, para que poidan ser consultadas por todos os interesados. Ao finalizar o certame, neste mesmo portal dixital, expoñeranse as obras premiadas nas distintas categorías como recoñecemento público aos novos escritores do Concello de Soutomaior.