Cofrico mellora a competitividade e o crecemento en mercados internacionais co programa ReAcciona
O director xeral do Igape, Javier Aguilera, destacou hoxe o compromiso da empresa Cofrico para mellorar a súa competitividade e consolidar a súa presenza en mercados internacionais, apoiándose nos servizos avanzados ofrecidos pola Consellería de Economía e Industria a través do programa ReAcciona.
Durante a súa visita ás instalacións que a empresa ten en Bergondo (A Coruña), Aguilera Navarro recoñeceu o esforzo pola mellora continuada desta compañía, líder española en instalacións de frío industrial e alimentario, que da emprego directo a máis de 150 traballadores. O grupo Cofrico está presente en mercados internacionais como Marrocos, Francia, Suiza ou Kazajstan.
Cofrico acolleuse ao programa ReAcciona co obxectivo de mellorar a súa competitividade con estándares internacionais de calidade e custo, mediante a implantación de novos procesos de compra e localización de provedores en mercados exteriores, ademais dunha aposta estratéxica para a fabricación, na súa planta de Bergondo, de eficientes equipos propios para a refrixeración e a climatización industrial.
Entre os servizos avanzados ofertados polo programa ReAcciona máis demandados polas empresas galegas están os de relanzamento comercial, os de profesionalización da produción, os destinados a introducir cambios nos procesos de xestión e a redefinir unha parte do negocio. Nas próximas semanas, o Igape prevé activar de novo este programa pioneiro en Galicia para seguir apoiando ás pemes galegas nos seus procesos de mellora da competitividade.
O Programa ReAcciona facilita servizos orientados a achegar novas competencias e habilidades para o capital humano das empresas. Os servizos prestados a través deste plan están dirixidos polo Igape, que conta coa colaboración de expertos destacados nos principais ámbitos de xestión empresarial; ao tempo, o instituto facilita a colaboración de novos titulados que, como bolseiros, se especializan e adquiren experiencia durante os procesos de mellora.