O Escola de Piragüismo Cidade de Pontevedra logrou un brillante triunfo no Trofeo Príncipe de Asturias

Imaxes das probas

O Escola de Piragüismo Cidade de Pontevedra logrou un brillante triunfo no prestixioso Trofeo Príncipe de Asturias que se disputou en Verducido. O equipo pontevedrés demostrou o seu enorme potencial e conquista a súa segunda vitoria importante tras impoñerse no Descenso do Miño. Ás Torres Romaxe Viquinga foi segundo e o Club de Mar Ría de Aldán rematou terceiro. Participaron 24 clubs e máis de catrocentos padexeiros. Disputáronse nove probas.

O Cidade de Pontevedra mostrou unha gran regularidade e tamén unha enorme fortaleza en case todas as categoría. O estado de forma dos seus deportistas así demóstrano. Ademais do seu potencial, tamén foron capaces de interpretar as probas, nas que importaba moito a táctica. Cada deportista debía comezar en solitario, despois esperar un compañeiro para o barco dobre e para finalizar nas embarcacións de catro compoñentes. Había que coordinarse no porteo para non cometer erros nin penalizacións. O percorrido total era de 6.000 metros.

Os mellores resultados do Cidade de Pontevedra foron coas súas novas promesas, o que o converte xa nun punto de referencia para o futuro. Na categoría xuvenil home K-4, Cristian Torres, David Figueira, Jacobo García e José Carlos Sobral foron segundos. Só foron superados polo equipo do Verducido Pontillón composto por José Julio Villanueva, Aarón Dieguez, Alfredo Fernández e Alberto Rodríguez.

Adrián Vilas, Alberto Rodríguez, David González e Martín Acuña tamén foron segundos na categoría cadete C-4. Discutíronlle o primeiro posto aos padexeiros do Escola de Piragüismo Poio, que foron os gañadores, case ata o final da regata.

Tres formacións lograron puntuar na regata de K-4 cadete, colocando as súas embarcacións nos postos terceiro, sexto e duodécimo. Os gañadores foron os padexeiros do Club Naval de Pontevedra.

En muller cadete K-4, Andrea Magariños, Isabel Moya, Niquea Outeiral e Noelia Rodríguez remataron cuartas. Nesta categoría foi o Club Ría de Aldán Hermanos Gandón os que lograron o triunfo.

Na categoría sénior, o Cidade de Pontevedra foi sétimo en K-4 home. O gañador foi o Kaiak Tudense. En home sénior C-4, os pontevedreses remataron no cuarto e o noveno lugar respectivamente. O Kaiak Tudense tamén se impuxo nesta categoría.

E en K-4 mulleres, Jenifer Casal, Nerea Gondar, Raquel Rodríguez, Lidia Martínez foron sextas, pero demostrando un gran rendemento. Os tudenses, dominadores da categoría sénior, tamén lograron o triunfo nesta modalidade.

Noutras probas, o Club de Mar Ría de Aldán Hermanos Gandón impúxose en muller xuvenil K-4 e o Náutico de Pontecesures en home xuvenil C-4.

O Trofeo Príncipe de Asturias, que contou co apoio da Deputación de Pontevedra e a organización da Federación Galega de Piragüismo, resultou un grande éxito, tanto polo nivel demostrado polos padexeiros coma polo espectáculo que ofreceron.