Abegondo, Bergondo e Carral únense nun proxecto conxunto para aforrar 17.200 euros ao ano en iluminación pública

Os Concellos de Abegondo, Bergondo e Carral apostan por repetir a alianza que propiciou a concesión dun obradoiro de emprego
que actualmente se encontra en fase de desenvolvemento. Agora, os gobernos dos tres Concellos decidiron unir forzas para emprender unha actuación conxunta de mellora da eficiencia enerxética na iluminación pública.

Os tres Concellos presentan unha necesidade similar que os levou a propoñer esta colaboración. As facturas da iluminación pública constitúen un dos principais gastos polo que os tres alcaldes apostan por introducir os novos sistemas de baixo consumo que procuren un importante aforro, á vez que non prexudican o medio ambiente.

Abegondo, Bergondo e Carral presentaron un proxecto conxunto ao Instituto de Enerxía de Galicia (Inega) para renovar os sistemas de iluminación de varios puntos de os tres municipios. En concreto, as actuacións supoñerán o cambio de lámpadas e luminarias de 289 puntos de luz, o que levará consigo un aforro enerxético de 123.637 kilowatios ao ano e de 17.273,55 euros ao ano.

En Abegondo, o proxecto efectuarase nos núcleos de Damil (parroquia de Figueroa) e A Saleta (parroquia de Presedo). En Bergondo, en Rois e en Costa de Ouces. E en Carral, en Tarroeira de Tabeaio e na rúa Víctor Velasco.

O presuposto total da actuación é de 139.153,38 euros. Por municipios, o 40,75% corresponden os traballos en Bergondo, 29,97% en Abegondo e 29,28% en Carral. Os tres Concellos solicitan o financiamento do Inega para o conxunto do proxecto, que se
aplicará nas porcentaxes referidas.

O alcalde de Abegondo, José Antonio Santiso, a alcaldesa de Bergondo, Alejandra Pérez, e o rexedor de Carral, José Luis Fernández Mouriño, apuntan que o gasto en iluminación pública acapara anualmente boa parte dos seus presupostos dos Concellos, ao tratarse de tres municipios cunha importante extensión de estradas e dispersión poboacional.

“Cando se trata de buscar vantaxes para os cidadáns hai que deixar atrás os cores políticas”, apuntan, unha experiencia que está a funcionar en proxectos como o mencionado obradoiro de emprego, a orientadora laboral compartida entre Abegondo e Bergondo, ou o propio Consorcio As Mariñas.