O Grupo Colmeiro formula converter Galicia en líder na adaptación das políticas ao aumento da poboación sénior

O Grupo Colmeiro, de análise e debate económico e social, formula converter Galicia en “líder” na adaptación das políticas autonómicas e locais ao aumento da poboación sénior. A profesora de Ciencia Política da Universidade de Santiago de Compostela (USC) Cristina Ares é a autora dun informe que realiza unha análise cuantitativa e cualitativa da situación de Galicia e o norte de Portugal neste ámbito, ante o que conclúe esta posibilidade.

Ares, en rolda de prensa xunto ao coordinador do grupo, o catedrático Luis Caramés, explicou que o envellecemento da poboación “esixe unha estratexia de adaptación de todas as políticas públicas”, incluída a educación, a vivenda e o medio, entre outros campos, e non só centrada no aspecto laboral. “Non debería limitarse á contención do gasto social”, advertiu.

A este respecto, destacou que as novas xeracións de maiores “serán máis esixentes” coas administracións e estarán máis dispostas a seguir contribuíndo á sociedade máis tempo.

Pero esta contribución non pasa solo por un eventual atraso da idade de xubilación -aspecto sobre o que a profesora entende que agora “puede” que pola situación económica “haxa que xubilarse un pouco máis tarde”, aínda que “non quere dicir que vaia ser así para sempre”-, senón que, para adiantarse ás futuras demandas, a comunidade debería promover programas orientados a aproveitar este “potencial” desperdiciado.

RECOMENDACIÓNS

Con este obxectivo de ver “unha oportunidade” no novo panorama demográfico, a responsable do estudio -no que se examinaron datos dende o ano 2000 ata a actualidade e se obtiveron outros a través de enquisas, grupos de discusión e entrevistas en profundidade- propuxo unha serie de recomendacións, en primeiro lugar a de “revisar a linguaxe oficial para desterrar palabras como maior ou envellecemento, coas que case ninguén se identifica”.

En segundo lugar, avogou por suprimir a discriminación asociada á idade de todos os ámbitos, e “singularmente” do mercado laboral. Un terceiro consello do grupo é a eliminación “radical” do paternalismo, e a conversión destas persoas que “aínda teñen que achegar” en “protagonistas”.

Outra das ideas extraidas do documento é a necesidade de promover equipos de traballo interdepartamentais e máis interdisciplinates nas administracións.

Para a prevención da dependencia, aposta por un enfoque multidimensional, no que a I+D+i ocupe un posto “destacado” en xerontoloxía e xeriatría, e sinala á promoción de maiores como mentores-titores de traballadores máis novos, algo que, segundo comentou Cristina Ares, xa se está a facer nalgúns países do norte de Europa.

SEGUIR MODELOS, “UN ERRO

Con todo, a profesora avisou de que “non hai modelo ideal” e que “seguir” un en concreto “é un erro”, posto que o “ideal” é ter en conta “a realidade” da comunidade galega. “Ademais, a intención é ser líderes no redeseñar das políticas públicas”, resaltou.

Dentro destas primeiras liñas nas que traballar, este grupo considera que “conviría apostar firmemente por fórmulas máis participativas no deseño das distintas política” e adecuar as medidas “aos públicos obxectivos concretos”, mediante unha definición máis precisa “dos clientes” de cada política ou programa.

A xeito de exemplo, Ares referiuse á diminución do número de estudantes das universidades, para chamar a atención sobre que “unha parte” deste colectivo sénior “serían estudantes ideais” de postgrao.

Por último, incidiu na relevancia de que haxa unha maior coordinación entre administracións e actores para conseguir mellores resultados, algo que ilustrou coa diferenza que neste apartado existe nas catro provincias galegas.

A CORUÑA, “POR ENRIBA” DO RESTO

Así, situou a A Coruña “moi por enriba” do resto, algo que atribuíu ás políticas da Deputación, que ofrece “apoio financeiro” aos concellos para a execución de medidas laborais e socioculturais, con teleasistencia e centros de día, entre outras cuestións.

Na aplicación destas medidas entran en concurso fondos europeos, de aí a importancia da colaboración e coordinación, segundo indicou, antes de remarcar as opcións que dan hoxe en día as novas tecnoloxías para que, quen así deséxano, poidan “envellecer no seu fogar”, algo que, por motivos culturais, é habitual en Galicia.

Neste sentido, constatou que non se trata solo das infraestruturas existentes, senón dunha modificación da visión “integral” do conxunto das políticas.

Pola súa banda, Caramés fixo fincapé no factor tecnolóxico, que pode incrementar a produtividade, e chamou ao optimismo, polos beneficios que se poden extraer disto.