“Tempos para compartir” mostra o proceso de elaboración conservas caseiras en Igrexafeita

A inmensa maioría da xente de San Sadurniño ten horta na casa. Mesmo hai quen ten maciñeiras, pereiras e outras árbores de froita. Practicamente todo para o autoconsumo e practicamente todo aproveitado segundo a temporada para consumo en fresco. Porén, é habitual que haxa máis produción da necesaria para a casa e que nuns casos se opte por repartir con familiares e veciños e noutros, nos menos, por vender ese excedente. Pero hai máis vías para darlle saída ao que cultivamos e cada vez vai ganando máis terreo a elaboración de conservas para ter á man e durante todo o ano o que dá de si a terra. Lois Anxo Rodríguez ofreceu este sábado en Igrexafeita unha clase maxistral sobre como conservar alimentos vexetais. Foi durante o Tempos para compartir de maio, onde as 20 persoas asistentes tamén aprenderon a preparar bonito en aceite.

Lois Anxo Rodríguez é o actual director do CPI de San Sadurniño. Pero antes foi tamén director do IES Fraga do Eume, un dos centros de referencia en Galicia para a ensinanza de todo o que rodea a hostalaría. Iso e o feito de que sexa mestre e un grande afeccioado á cociña convertérono no poñente ideal para impartir un Tempos… centrado en algo tan sinxelo e útil como a elaboración de conservas caseiras.

A conserva en botes de cristal só ten dúas ciencias: os puntos de cocción e unha hixiene estrema durante todo o proceso. Lois Anxo explicou catro receitas: a das xudías, a dos grelos -ou calquera outro vexetal parecido-, a da conserva de pisto ou salsa de tomate e tamén a do bonito en conserva de aceite. As xudías e os grelos só levan auga, sal e zume de limón. Abonda con escaldar a materia prima durante dous ou tres minutos e despois encher os botes con auga, sal -unha cullerada por litro- e co zume de medio limón tamén por litro de auga. No caso de pistos e salsa de tomate hai que facer a elaboración normal e despois envasar. Por último, se queremos conservar bonito primeiro hai que cocelo con catro culleradas de sal por litro de auga, despois desespiñalo e limpalo ben, facer lombos e metelos no frasco ao que se lle botará un bo aceite de oliva quente -mellor que non sexa virxe- practicamente ata o borde.

Ata aquí todo claro. Porén o éxito dunha conserva ten máis que ver coa limpeza que coa calidade do produto. E é que todo o proceso se basea en eliminar con calor os microorganismos que poden botar a perder os alimentos dentro do bote. Por iso é tan importante traballar nun ambiente o máis limpo posible (coitelos, culleres, táboas, superficies) e ter por costume lavar as mans constantemente. Poden usarse frascos de cristal coa tapa en bo estado. O aconsellable é mercar tapas novas e, sexa como sexa, primeiro hai que lavalo todo ben, preferiblemente na lavalouzas cun programa longo a alta temperatura. 

Despois botes e tapas métense a ferver nunha pota con auga ata que teñamos a punto o alimento que queiramos envasar. O proceso de envasado ten que ser rápido, co produto e o bote en quente, de maneira que se evite a entrada deses microorganismos que estragarían a conserva. Xa coa tapa posta hai que esterilizar de novo: ben cunha ola a presión con 2 dedos de auga e durante 25 minutos despois de que empece a saír vapor -este é o método recomendado-, ou ben ao baño maría durante 50 minutos.

Nunha tarde de traballo podemos preparar bonito, salsa de tomate, grelos, xudías e mesmo riquísimas peras ao viño para o resto do ano… para varios anos incluso. A técnica permite con pequenas variacións facer o mesmo con cogumelos, con mermeladas e pequenos froitos en almibre. En internet hai ducias de videos e tutoriais sobre como facelos. Con todo, sempre será mellor que alguén con experiencia -como neste caso- nolo explique paso a paso e véndoo ao vivo. Niso consiste precisamente o programa Tempos para compartir, no que calquera pode participar mostrando o que saiba facer. Se queres propoñer un destes obradoiros só tes que chamar ao 981 490 027 ext. 1.