“Fálame de San Sadurniño” achega dúas novas entregas audiovisuais

A web falamedesansadurnino.org está que bota por fóra en canto a contido audiovisual. En menos dunha semana publicáronse nela tres pezas con estilos e temas moi distintos pero unidas polo papel protagonista de San Sadurniño, quer a través da súa historia, quer a través da súa xente. A estrea de “Cruz Piñón”, dirixida por Xisela Franco dentro do Chanfaina Lab, seguiuna o documento “Faladas de Muller”, no que participaron unha trintena de mulleres dos obradoiros de memoria activa. Por último, este mesmo sábado, Fálame… achegounos o segundo audiovisual gravado en San Sadurniño polo realizador Xurxo Chirro, “Cartas de Conquista”, que conecta pasado e presente por medio do espazo do Pazo e dos escritos de Natividad Quindós, a súa última moradora nobre.

“Faladas de Muller” é un documental baseado en fotografías e testemuños de 30 mulleres de varias parroquias de San Sadurniño, onde se nos mostra como era a vida -ás veces penuria- feminina desde comezos do século XX. Relatos sobre as avoas, as nais e sobre elas mesmas contados seguindo o fío condutor da propia vida: o nacemento, a infancia, a mocidade, o matrimonio, o sexo e a morte. Facetas do vivido que se ilustran con audio e imaxe estática, pero tamén coa dramatización dunha esfolla e incluso coa representación dun mortorio. 

O traballo é froito da colaboración entre o Departamento de Igualdade e a Aula Cemit, dentro do programa de memoria activa. A peza presentouse o 28 de marzo durante o acto central organizado polo Concello co gallo da celebración do Día Internacional de Muller e poucos días despois comezou a estar dispoñible na canle de youtube de falamedesansadurnino.org.

“Cartas de Conquista”: o pasado presente de Xurxo Chirro

Fálame de San Sadurniño continúa debullando o que deu de si o encontro audiovisual Chanfaina Lab. A última estrea virtual da serie de curtas producidas en San Sadurniño durante a primeira fin de semana de setembro é “Cartas de Conquista” do realizador Xurxo Chirro, que achegou tres pezas ao proxecto. Esta é a segunda que se estrea e con ela volve sorprendernos facendo unha revisión ficcionada do Pazo da Marquesa e de Natividad Quindós, a última representante dunha estirpe nobre arraigada en San Sadurniño desde o medievo.

Segundo a ficha da peza en Fálame…, Chirro -como especialista na obra de Manoel de Oliveira- homenaxea ao recentemente finado director portugués e máis concretamente ao seu filme “Amor de perdiçáo”, sostendo o argumento sobre as cartas lidas por unha investigadora de visita no Pazo. “Cartas que se len desdramatizadas, de xeito frontal, hierático, monocorde e teatral”. Chirro xoga coa historia e co dominio case feudal dos marqueses de San Sadurniño, recuperando “o valor do texto e a palabra, mais tamén da palabra como creadora da manipulación histórica”. 

“Conquista -prosegue a ficha- ten un dobre significado, pois era o título nobiliario principal de Natividad Quindós, mais ao tempo a expresión do dominio da Marquesa sobre a súa contorna: a conquista territorial do seu inmenso patrimonio; a conquista económica, controlando os impostos aos colonos; e a conquista do prestixio social pola súa proximidade á monarquía borbónica; en definitiva unha reflexión histórica sobre o poder alcanzado no devir do tempo. Porén, a actriz lé os “aparentes” documentos nun antigo espazo privado de poder que hoxe é patrimonio social da veciñanza. Por elo “Cartas de conquista” é unha lúcida reflexión sobre as sinapses do pasado e o presente, o territorio e a memoria, como vén facendo en moitos dos seus filmes Xurxo Chirro”. 

“Cartas de Conquista” é a curta nº 11 do Chanfaina Lab e a segunda que poderemos ver deste autor guardés, que estreará tamén proximamente “Teleclube” como mirada persoal do que supuxo a chegada da televisión a Lamas.