O reitor da UDC advirte de que a reforma universitaria pon máis trabas aos que teñen menos recursos

O reitor da Universidade da Coruña (UDC), Xosé Luis Armesto, riscou o decreto que reforma os estudios superiores de “desestabilizador” para o sistema universitario e advertiu de que, se non se pon “remedio”, esta medida porá “máis dificultades” para cursar estudios superiores aos que “menos recursos” teñen.

Así manifestouno na súa intervención na inauguración do ciclo de conferencias ‘A Universidade pública posible” na Facultade de Ciencias da Coruña, despois de que este martes os tres reitores galegos asegurasen estar “en plena sintonía” coa moratoria decidida pola Conferencia de Reitores das Universidades Españolas (CRUE) para aprazar a implantación de graos de tres anos ata o curso 2017-2018.

“É unha moratoria activa para reflexionar, dialogar e ver cual é a mellor opción. Tomamos un tempo. Penso que da reflexión poden chegar acordos para ver como avanzar”, indicou, en declaracións aos xornalistas, antes de participar no acto de inauguración ao que seguía unha conferencia impartida polo exdirector xeral da Unesco, Federico Mayor Zaragoza.

Para o reitor coruñés, a medida que permite a oferta de graos universitarios de tres anos máis dúas de master suporá “un custo máis elevado para as familias”, xa que os másteres son “moito máis caros” que os graos. “Se iso segue así e non se pon remedio, vai ser elitista, excluínte e dende logo non estamos de acordo con esas formulacións”, engade.

DESREGULACIÓN

Nesta mesma liña pronunciouse durante o seu discurso no acto de inauguración. Nel advertiu sobre a “desregulación” do sistema universitario, que xa se iniciou, ao seu entender, con normas como o decreto de taxas ou o acceso a bolsas. “De forma inxusta endureceuse o acceso ás bolsas con novas discriminacións”, engadiu Armesto.

“Cremos que nos últimos anos, con ou sen proxecto de crise, se transloce certo interese en cuestionar a universidade pública tal e como a viñamos entendendo ata agora. E non só iso, creo que algunhas medidas concretas que se están a adoptar, sen discusión e pola vía do decreto, camiñan nesa dirección”, manifestou o reitor.

En concreto, fixo referencia ao decreto que reforma os estudios superiores. Un decreto que tachou de “desestabilizador” para o sistema universitario. “Sen rematar aínda o proceso de reforma de estrutura dos títulos, imos entrar xa, sen debate e sen consenso, noutra nova reforma chea de confusión”, apuntou.

“CRITERIOS IDEOLÓXICOS”

“As taxas dos másteres son moito máis elevadas que as dos graos e, polo tanto, cursar estudios superiores será máis caro. Máis dificultades para os que menos recursos teñan”, advertiu o reitor coruñés, que defendeu o papel “enriquecedor” que xoga a universidade publica.

A xuízo de Armesto, estanse a tomar medidas que levan á universidade “cara a un modelo distinto”. “As evidencias de desprestixio e desregulación dos servizos públicos, non só da universidade, permite entender que criterios ideolóxicos alentan esta situación. Criterios opostos aos principios elementais do Estado do Benestar e que agrandan a desigualdade”, continuou.

IGUALDADE SOCIAL

O acto tamén contou coa participación do presidente do Consello Social, Antonio Abril, quen subliñou o papel da universidade como “fábrica de talento” e como “grande instrumento” para a igualdade social.

“A universidade pública ten que seguir sendo, non só unha institución que garanta o acceso ao ensino superior en igualdade de oportunidades, senón ademais o grande instrumento de igualdade social pola vía do mérito e do esforzo; fronte á cultura da especulación e do enriquecemento doado que tanto dano lle fixo á sociedade”, concluíu Abril.