O voceiro parlamentario do PSdeG defende unha solución de consenso no PSOE da Coruña

O voceiro parlamentario do PSdeG e membro da executiva socialista (por este cargo), José Luis Méndez Romeu, defendeu chegar a “solucións de consenso e integración” fronte á “confrontación” en liñas xerais e, concretamente, despois de ser preguntado polo caso da Coruña.

O secretario xeral do PSdeG, José Ramón Gómez Besteiro, recorreu a Ferraz para resolver a situación do partido na provincia coruñesa, de maneira que decidiu enviar toda a información sobre o actual responsable dos socialistas na provincia da Coruña, Francisco Caamaño, ante a negativa deste a deixar o cargo.

O exministro de Xustiza, tras o conclave provincial de xullo que serviu para designar os delegados que haberían de referendar a elección de Pedro Sánchez como máximo líder do PSOE, e tras vencer a lista presentada polos seus opositores, acusou de “golpista” a dirección autonómica por entender que auspiciara este proceso.

O propio Besteiro chegou a solicitar en varias ocasións que dimitise durante a executiva do luns, co fin de elixir unha nova dirección antes de que dea inicio o proceso de primarias para escoller os candidatos municipais, algo que rexeitou o deputado autonómico.

TRASLADO Á DIRECCIÓN FEDERAL

A preguntas dos xornalistas, Méndez Romeu recordou que este luns, na executiva, houbo “un debate sobre este problema” no que se “escoitou todas as posicións” e acordouse trasladalo” á dirección federal para “ver cál debe ser a mellor solución” á situación da Coruña.

Así, indicou que as “posicións están abertas” para o que decida Madrid” e, sobre a súa opinión concreta, asegurou que el é sempre “partidario” de “solucións de consenso e de integración, antes que das de confrontación”.