A oficina de atención cidadá de Ferrol rexistrou 215 incidencias nas dúas primeiras semanas de funcionamento

Un total de 215 incidencias foron comunicadas pola cidadanía durante as dúas primeiras semanas de funcionamento do servizo telefónico centralizado da Oficina de Atención Cidadá do Concello de Ferrol. Este datos, rexistrados do 3 ao 14 de febreiro, responden ao número de incidencias comunicadas ao servizo municipal, xa que unha mesma persoa pode informar sobre diferentes incidentes. Este servizo contempla a centralización das comunicacións vía telefónica por parte da veciñanza no teléfono 981 94 40 00 e está operativo de luns a venres en horario ininterrompido de 08:00 a 20:00 horas.

Deste conxunto de incidencias rexistradas 45 foron solucionadas polos diferentes servizos municipais, dos cales 16 son mantemento de viarios, 3 de parques e xardíns, 22 de iluminación, 1 de limpeza viario e o resto responden a outros departamentos. Así mesmo, 66 foron informadas, 45 esperan resposta dos diferentes departamentos municipais para a súa comunicación e 59 están en tramitación. Durante estas dúas primeiras semanas de actividade, a franxa horario que rexistrou maior número comunicación de incidentes á Oficina de Atención Cidadá foi a de maña, de 8 a 14 horas, cun total de 158 incidencias informadas, mentres que en horario de tarde -de 14 a 20 horas- foron 57.

Seguimento das incidencias

Compre lembrar, que cada unha das incidencias recibidas ten asignado un número de identificación para o seu seguimento, e son posteriormente derivadas aos distintos supervisores municipais dos servizos que presta a Administración ferrolá para a súa tramitación e resposta, na medida da viabilidade técnica e económica da petición veciñal. Ademais, a estas comunicacións telefónicas hai que engadir as que se recibiron vía correo electrónico ou de maneira presencial.