Enviar a un amigo
Opinar
ImprimirA Casa de Cultura de A Cañiza acollerá un curso a 20 mulleres sobre mellora da empregabilidade
De cara a mellorar as posibilidades de atopar un emprego, o CEDIM ofrece unha formación totalmente gratuíta e práctica dirixida a 20 mulleres desempregadas da Vila.
Esta oferta formativa, que consta de 40 horas totais, será impartida en 8 sesións de 5 horas cada unha. Do 14 ao 19 de novembro, en horario de 09h30 a 14h30, impartirase o módulo sobre mellora das habilidades sociais e comunicativas e do 20 ao 21, esta vez en horario de 16h00 a 21h00, desenvolverase o módulo de detección de oportunidades de emprego. Este último módulo impartirase nun aula móvil situado na Praza Maior da Vila.
No caso de que se superaran as prazas ofertadas terían preferencia as mulleres empadroadas nos concellos de influencia da rede de centros CEDIM, as paradas de longa duración, as mulleres que procuran o primeiro emprego e aquelas veciñas maiores de 45 anos, con diversidade funcional.
As participantes recibirán un diploma acreditativo da formación realizada.
Todas as persoas interesadas poden ampliar esta información ou inscribirse no departamento de Servizos Socias do Concello da Cañiza.
Que é o Proxecto CEDIM?
O CEDIM (Centros de Dinamización Integral para as Mulleres) é un proxecto transfronteirizo, cofinanciado polo Fondo Europeo de Desenvolvemento Rexional a través do Programa de Cooperación Transfronteiriza entre España e Portugal 2007-2013, que ten entre os seus obxectivos mellorar a calidade de vida, potenciar a autonomía e o empoderamento das mulleres raianas e a súa participación no desenvolvemento económico do territorio.
Son entidades responsables do proxecto: a Secretaría Xeral da Igualdade da Xunta de Galicia, a Comissâo para a Cidadania e a Igualdade de Género, a Axencia para a Modernización Tecnolóxica de Galicia e a Fundación para o Fomento da Calidade Industrial e o Desenvolvemento Tecnolóxico de Galicia.
Forman parte do territorio CEDIM, os concellos galegos de Tui, A Cañiza e Monterrei e a localidade portuguesa de Vila Verde.
