Outeiro estrearase esta fin de semana na Feira Turexpo de Silleda
Un ano máis o Concello de Outeiro de Rei acode a TUREXPO cun posto de deseño a través do cal se dan a coñecer unha parte dos importantes atractivos turísticos que ten o municipio.
A través de diversos paneis promocionais e co apoio dun mapa-guia turístico editado recentemente polo Concello de Outeiro de Rei e doutros recursos publicitarios que se poden ver e obter no posto, móstrase ao visitante recursos paisaxísticos de singular beleza como o Campo de Santa Isabel, fermosa carballeira situada a beiras do río Miño e dende o que se pode observar a confluencia do río Ladra no chamado pai dos ríos galegos; a área recreativa de Penas de Rodas, monumento solar e fermoso miradoiro natural da Terra Cha, onde se localizan dúas enormes moles graníticas entorno ás cales a fantasía popular teceu múltiples lendas; o Salto do Piago, belo espazo natural no discorrer do río Miño e que é usado en período estival como lugar de esparexemento e baño ou a Ponte Colgante de Parada, que nos permite o acceso unha pequena illa que conserva gran variedade de vexetación autóctona.
Tamén se mostra a olaría de Bonxe, unha das catro cerámicas máis antigüas de Galicia e que ten orixe neste municipio. Outros artesáns do municipio como Xaneco, que fai instrumentos de percusión tradicional ou Idoia Cuesta, que se dedica á elaboración de tecidos vexetais (tapices e cestos) están representados cunha mostra dos produtos que elaboran.
No posto tamén se decata da oferta de turismo rural existente en Outeiro de Rei composta por tres magníficas casas: Río Ladra, que alberga nunha das súas edificacións unha espectacular colección de aparatos de raio no museo chamado Casa dá Raio, ou Lugar de Pascuais e Reboreda de Abaixo, casas que complementan a importante oferta hostaleira que hai neste concello.
Así mesmo, promóvense dous centros de natureza, que dende hai tempo son xa coñecidos e moi visitados por escolares e público en xeral: Avifauna que permite ao visitante facer un interesante percorrido polo mundo das aves e Marcelle Naturaza, espazo no que encontramos bisontes, cebras, canguros…
Outro dos atractivos deste municipio é a celebración dende hai seis anos dunha atractiva feira de artesanía que se celebra o primeiro sábado do mes de xullo e á que acoden artesáns de toda Galicia e de comunidades limítrofes.
Esta feira estará aberta dende este venres día 22 ao domingo día 24.
Sorteo de estanzas
O último día da feira, ás 18,00 h, terá lugar o sorteo de tres estanzas nas referidas casas de turismo rural polo que se anima aos visitantes a participar.