publicidade hoxe
Publicidade
omeulibro1

Sete formacións de seis países dan forma ao cartel do 10º aniversario do festival Pórtico do Paraíso

Sete formacións de cámara procedentes de seis países actuarán do 3 ao 12 de marzo en diferentes espazos singulares de Ourense, Esgos e Xunqueira de Ambía como parte do cartel co que o Festival Internacional de Música de Ourense Pórtico do Paraíso conmemora o seu décimo aniversario.

A Consellería de Cultura, Educación e Ordenación Universitaria, a través da Axencia Galega das Industrias Culturais (Agadic), volve ser unha das entidades colaboradoras do encontro no marco do seu apoio á difusión da música culta entre o público galego. Neste caso, este obxectivo cúmprese por medio de sete concertos de grupos vocais, de cámara e solitsas de España, Francia, Gran Bretaña, Hungría/Palestina e República Checa, así como de dous encontros artísticos no Conservatorio Profesional de Música de Ourense.

O director da Agadic, Jacobo Sutil, participou hoxe na presentación da décima edición do festival xunto a José Manuel Baltar, presidente da Deputación Provincial de Ourense; Jesús Vázquez Abad, alcalde de Ourense; Juan Enrique Miguéns, presidente da Asociación Pórtico Musical; e Valentina Granados, vicepresidenta da Asociación Española de Festivales de Música Clásica Festclásica.

Na súa intervención, Jacobo Sutil felicitou os promotores do encontro –o Concello de Ourense e Pórtico Musical– por estes dez anos de traxectoria durante os que “souberon combinar, manter e mesmo incrementar o interese artístico deste festival co tecido da rede de apoios necesarios para facer del unha iniciativa forte e consolidada”, asegurou.

Novos públicos e vocacións musicais

Enmarcou o apoio da Agadic a esta iniciativa dentro do programa de accións da Administración autonómica para a promoción da música culta, ben no ámbito dos conservatorios, orquestras e escolas de música, ben a través da promoción de concertos que –como no caso dos programados polo Pórtico do Paraíso– contribúen a crear públicos e a forxar vocacións.

En palabras do director da Axencia Galega das Industrias Culturais, o festival “atende a dúas realidades: a do goce da execución música en lugares de gran beleza arquitectónica e a atención aos estudantes de música. E isto sen desmerecer outros acertos como a extensión da súa programación a outras localidades da provincia, como Xunqueira de Ambía e Esgos”.

Programa en Ourense

Así, na cidade de Ourense, a catedral de San Martiño acollerá o venres 3 de marzo o concerto inaugural desta décima edición, a cargo do grupo instrumental e vocal inglés His Majestys Sagbutts and Cornetts. O domingo 5 será a quenda do Haroni Duo, formación húngaro-palestina do pianista Bishara Haroni e a violinista Adi Haroni, que tocará no Teatro Principal e protagonizará, así mesmo, un dos encontros co alumnado do Conservatorio de Música ourensán. Estas accións formativas contarán tamén coa participación do grupo galego de música antiga Resonet.

A programación continuará o mércores 8 de marzo no Museo Arqueolóxico co dúo galego Mercedes Hernández e Fernando Reyes (voz, cítolas e laúdes medievais), a representación española nesta carteleira xunto co recoñecido ensemble barroco Accademia del Piacere, que actuará o venres 10 na igrexa de Santa María Nai. Outro dos escenarios ourensáns será a igrexa de Santiago de Caldas, que o domingo 12 acollerá o concerto do orixinal quinteto vocal británico The Orlando Consort.

Xunqueira de Ambía e Esgos

Outra formación vocal masculina, o octeto da República Checa The Gentlemen Singers, será a protagonista da extensión do festival en Xunqueira de Ambía, co seu recital do sábado 4 de marzo na igrexa de Santa María A Real, mentres que a voz e a arpa medieval da francesa Brigitte Lesne soarán o sábado 11 de marzo en San Pedro de Rocas, en Esgos.

A partir de hoxe quedarán activados os novos contidos da web www.porticodoparaiso.com, coa información sobre a venda anticipada de entradas, así como sobre o servizo de gardería que manterá a organización durante os concertos.

23 de xaneiro de 2017 | 16:14 • Sen comentarios

Comentarios pechados.