Carlos Mouriño condiciona a súa continuidade no Celta a que o Concello lle venda Balaídos

O presidente do Real Club Celta de Vigo, Carlos Mouriño, condicionou a súa continuidade á fronte do club a que o concello lle venda o estadio municipal de Balaídos, para con iso poder explotar a zona comercial e darlle “magnitude” e solvencia económica ao equipo.

Así manifestouno este martes nunha rolda de prensa, na que advertiu de que non está disposto a asumir “exclusivamente a responsabilidade de sacar adiante” ao club, que necesita “magnitude”, e que esta se lle debe dar “conxuntamente coa cidade”.

Por iso, propuxo ao concello que venda o estadio ao equipo para poder explotar a súa zona comercial. “Non asumo a responsabilidade de sacar isto adiante exclusivamente só. Presentamos tres ou catro proxectos para darlle magnitude e solvencia económica ao club e non se aceptaron”, sinalou.

Ademais, deixou claro que traballa “con futuro” e avisou de que, no caso de non dar ao proxecto “unha capacidade económica acorde co resto do clubs e coa cidade”, vai o longo prazo “moi feble e con nubarrones”, aínda que o curto sexa “espléndido”.

“Non é un pulso, é dicir se o proxecto continúa ou non; é un compromiso coa cidadanía e cos celtistas, non con ninguén máis. Que o estuden polo menos os partidos políticos”, requiriu o presidente do club da cidade olívica.

REFORMA DO ESTADIO

“Comprometémonos á compra de Balaídos e a obra (a reforma que se está a acometer) pagaríaa o Celta. O club asume esa responsabilidade, pero que o compromiso sexa de todos”, indicou, demandando que o concello lle dea “o mesmo” que outros lle deron a Real Madrid, Sevilla ou Valencia. “Non me pidan a mesma responsabilidade sen darme as mesmas armas”, apostilou.

En canto a esta proposta, afirmou que existen dúas opcións. “O concello para a obra e facémola nós e ao final pagámoslle a súa parte, ou remátaa e pagámoslla en dez anos, pero téñenme que dar o comercial para que, cando se pague a débeda, deixe un club cuns ingresos que me compensen o diferencial co resto. Que as zonas libres do estadio pasen a propiedade do Celta e facer a parte comercial que crese oportuna, pero todo a nome do Celta, nin un particular nin unha empresa”, advertiu.

“CONCIENCIA TRANQUILÍSIMA”

O presidente da entidade celeste asegurou que ten a “conciencia tranquilísima” e que o club está “nun magnífico momento”. “Pero non podemos confiarnos, a diferenza cos demais en ingresos son grandes e cando estes sexan capaces de pagar as súas débedas, a nosa desigualdade con eles será grande”, engadiu.

“Cremos que demos unha solidez grande ao club, pero non podemos darlle magnitude, e isto ou se fai conxuntamente con cidade ou danlla outros. Será a cidade a que decida o que queira facer porque o celtismo terémolo que compartir, non só a parte económica”, recalcou Mouriño.

Este lamentou que dende a entidade non se coñeza “ningunha proposta de capital galego ou vigués”. “Pode haber vigueses que teñan outras propostas, que nolas fagan saber. Se son de Vigo moito mellor, pero non recibimos nada”, reiterou.

O presidente celeste resaltou que pelexará “a morte” polo futuro do club e mantivo que, se para darlle solidez económica debe vendelo, o fará, aínda que recoñeceu que non ten “motivación para pelexar” polo Celta.

“Conmigo vai meterme en problemas, como facer a Cidade Deportiva e pensar de onde sacabamos o diñeiro; comigo vai a parte empresarial, que foi a que lle deu éxito. Non é o meu obxectivo sentarme a esperar un resultado cada semana. O único que corre riscos aquí son eu”, sentenciou.

VENDA DO CLUB

Sobre as propostas de compra, confirmou que este luns recibiu “unha máis” procedente de Catar, pero subliñou que o Celta “non” está posto en venda.

“Aos que preguntaron dixémoslles que non entrabamos en negociación, que fixesen unha proposta e que se a viamos aceptable empezariamos a falar da parte económica e de proxecto. Se houbese algún compromiso pola miña parte dunha venda, non podería facer a oferta á cidade, sería imposible”, xustificou.

En canto á oferta chegada de China, o empresario descoñece “de qué grupo se trata” e revelou que comeu cos seus representantes tras o partido ante o FC Barcelona. “Hai que analizar o proxecto completo. Non o temos analizado cos chineses e mentres tanto non decidiremos. O como será para Vigo, para o Celta: como o van facer, iso non se deu aínda”, declarou, puntualizando que dende a entidade se enviou “documentación, nada máis”.

Preguntado sobre a ampliación de capital que tiña prevista e que levantara críticas, o presidente do club vigués foi claro. “Teño o control, ¿para que quero máis capital?. O Celta tenme que devolver o diñeiro e para que estea máis cómodo fago unha ampliación, para que eu non cobrase e lle quedase ese diñeiro en caixa e darlle máis solidez económica”, subliñou.