A Xunta aproba o convenio de adhesión do concello de Vedra á APLU

O Consello da Xunta aprobou na súa reunión de hoxe o convenio de adhesión á Axencia Galega de Protección da Legalidade (APLU) do concello coruñés de Vedra, polo que, a partir de agora, este municipio delega neste organismo as súas competencias municipais de inspección, supervisión, sanción e restablecemento da legalidade urbanística respecto das obras e usos do solo que se realicen en solo rústico, en solo urbanizable mentres non sexa aprobado o correspondente plan parcial ou de sectorización, así como no ámbito dos núcleos rurais delimitados.

A integración deste concello na APLU será plenamente efectiva unha vez asinado o respectivo convenio de colaboración e logo da súa publicación no Diario Oficial de Galicia (DOG).

Así mesmo, os ingresos obtidos por multas coercitivas e sancións administrativas impostas en exercicio das competencias delegadas, serán repartidos a partes iguais de modo que o 50 por cento pasará á Administración autonómica e o 50 por cento restante ás administracións municipais.. 

Deste xeito, o Concello de Vedra sumarase aos 64 concellos que a día de hoxe forman parte da Axencia de Protección da Legalidade Urbanística.

 Este proceso lévase a cabo conforme a lei do 30 de decembro, de ordenación urbanística e protección do medio rural de Galicia, onde se establece que a APLU é un ente público de natureza consorcial, dotado de personalidade xurídica, patrimonio e orzamento propios e plena autonomía no cumprimento das súas funcións, para o desenvolvemento en común pola Administración autonómica e os municipios que voluntariamente se integren nela das funcións de inspección, restauración da legalidade e sanción en materia de urbanismo e o desempeño de cantas outras competencias lle asignan os seus estatutos.