Alumnos do IES Divino Mestre visitan o polígono de San Cibrao

A visita dos alumnos do IES Divino Mestre de Ourense deu hoxe continuidade á terceira edición do programa “Eduemprende Atrévete”, que ten como gran desafío estimular a cultura emprendedora entre os estudantes dos centros educativos da provincia de Ourense e doutras zonas da comunidade galega. Esta iniciativa formativa da Asociación de Empresarios do Polígono de San Cibrao conta co apoio da Consellería de Cultura, Educación e Ordenación Universitaria.

Como vén sendo habitual, no inicio do programa os alumnos puideron coñecer as instalacións da Asociación de Empresarios, especialmente a súa Aula de Emprendemento, onde ademais de coñecer a historia do polígono industrial máis antigo de Galicia, tamén aprenderon a desenvolver as súas propias ideas de negocio.

A continuación, o grupo de escolares percorreu as instalacións centrais do grupo Adolfo Domínguez, na rúa 3 e 8 do Polígono. Nunha visita guiada, coñeceu de forma directa as claves que posibilitaron o éxito internacional da compañía téxtil ourensá. A participación deste referente español da moda no programa de visitas escolares da Asociación de Empresarios do Polígono amplía a representatividade de sectores e reforza a visión que teñen os alumnos da ESO sobre os líderes empresariais e industriais da provincia de Ourense.