Reforzo para dotar aos centros de apoio de docentes especialistas en Pedagoxía Terapéutica e Audición e Linguaxe

O conselleiro de Educación, Ciencia, Universidades e Formación Profesional, Román Rodríguez, avanzou hoxe na reunión da Xunta autonómica de directores e directoras que o seu departamento vai reforzar o sistema para dotar os centros educativos de persoal de apoio de carácter extraordinario, a maiores dos que xa teñen asignados por catálogo os colexios e institutos.

Esta é unha das medidas recollidas na Estratexia de inclusión educativa 2030, a folla de ruta da Consellería para afianzar a igualdade e a equidade do modelo de ensino galego. Román Rodríguez recalcou que tamén entronca coa prioridade do seu departamento de reducir a carga burocrática nos centros, un dos puntos do Acordo para a mellora do sistema educativo no que xa se está traballado a través da Comisión para a simplificación e eficiencia na xestión. De feito, a este respecto lembrou que a Consellería está ultimando un plan de simplificación documental e desburocratización para “alixeirar” a carga dos centros neste eido con liñas específicas como a dixitalización, a xestión de datos e documentos e a revisión e actualización normativa, entre outros.

Así pois, a Consellería de Educación vén de elaborar unhas instrucións específicas para a organización do profesorado e, concretamente, para a asignación extraordinaria de profesorado especialista en Pedagoxía Terapéutica e Audición e Linguaxe. Segundo explicou o conselleiro, trátase de establecer un procedemento regrado que facilitará e axilizará o proceso entre a Inspección Educativa e os propios centros, o que redundará nunha mellor organización e eficiencia dos recursos ao servizo da educación e ofrecerá máis garantías aos centros.

Comisión técnica de valoración

Co fin de blindar o reparto óptimo deste persoal de apoio de carácter extraordinario que se suma aos que xa contan de base os centros, en cada Servizo Territorial de Inspección Educativa organizarase unha comisión técnica de valoración que prestará asistencia ás xefaturas de Inspección e aos inspectores á hora de valorar e asignar estes apoios de docentes especialistas.

O titular de Educación do Goberno galego aproveitou a reunión da Xunta autonómica de directores e directoras para agradecer o labor dos equipos directivos e do conxunto do profesorado ao longo do curso que vén de rematar. Así mesmo, comprometeuse a seguir traballando “con toda a responsabilidade” para afianzar o modelo de calidade do ensino que vén avalado por indicadores internacionais como PISA e polas estatísticas do Ministerio de Educación, con medidas dirixidas ao alumnado e ao profesorado.

De cara ao vindeiro curso, continuarase implementando a baixada de ratios a 20 alumnos por aula, que a partir de setembro se amplía a 5º de Infantil. Ademais, cómpre lembrar que Galicia é a única comunidade que aplica unha ponderación do alumnado con necesidades educativas especiais, contabilizándoo por dous ou por tres a efectos de ratios dentro da aula.

Por outra parte, acaba de arrancar o proceso de oposicións no ensino, con 1.664 prazas convocadas de persoal funcionario que reforzarán o cadro docente na educación pública galega, o que mellorará a ratio de alumnos por profesor nas aulas, que actualmente xa é a terceira mellor de España.