O Ano Castelao difúndese na Feira do Libro en Bos Aires

A Consellería de Cultura, Lingua e Xuventude realiza unha decena de actividades no expositor institucional, no Centro Galicia e no Instituto Santiago Apóstol.

A Xunta de Galicia continúa a proxectar internacionalmente a programación do Ano Castelao, artellada para difundir e preservar o legado do intelectual galeguista, do que se cumpren este ano 75 anos do seu pasamento. Nesta ocasión, o Goberno galego está a desenvolver unha decena de actividades na cidade de Bos Aires a través de relatorios, mesas redondas e exposicións que se están a desenvolver no expositor institucional da Feira Internacional do Libro e, paralelamente, no Centro de Galicia e no Instituto Santiago Apóstol, nas que está a participar o director xeral de Cultura, Anxo M. Lorenzo.

Nesta liña de difusión internacional, a Xunta ten desprazado á capital da Arxentina unha delegación de autoras e autores convidados, vencellados coa figura do intelectual galeguista, como son o presidente da Fundación Castelao, Miguel Anxo Seixas, o director da Cátedra Institucional Castelao na Universidade de Santiago de Compostela, Henrique Monteagudo, e o director de Edicións de Galaxia, Marcos Calveiro.

Todos eles levan afondando e divulgando, durante esta semana, sobre a relevancia desta figura senlleira da cultura, historia e política de Galicia tanto na Feira Internacional do Libro de Bos Aires como en diferentes actos nas institucións bonaerenses relacionadas coa Comunidade galega.

Precisamente, hoxe mesmo, o representante da Consellería de Cultura, Lingua e Xuventude asistirá, no expositor da Xunta na Feira Internacional do Libro, aos relatorios Nós/Nosoutros, a ollada de Castelao, que impartirá Marcos Calveiro e ao A Cátedra Castelao de estudos galegos na Universidade de Buenos Aires, de Ruy Farías, mestre nesta mesma universidade da cidade da Prata e tamén doutor en Historia pola de Santiago de Compostela. 

A programación do Ano Castelao continuará mañá na feira coa conferencia Crear porvir: 75 aniversario da Editorial Galaxia, cuxa fundación ten como unha das súas orixes á morte do escritor de Rianxo, e que correrá a cargo do director de Edicións desta entidade. Sumaráselle a estas actividades, o relatorio de Miguel Anxo Seixas que leva por título Castelao: arte e verdade.

Cómpre salientar que, ao longo de toda esta semana, as actividades ao redor do Ano Castelao non só se concentraron na Feira do Libro. Así, o pasado mércores, 30 de abril, o director xeral de Cultura inaugurou exposición Castelao e Bos Aires. De Sempre en Galiza a Alba de gloria, no Centro Galicia da cidade bonaerense. 

De igual xeito, Henrique Monteagudo impartiu estes días diferentes relatorios sobre a obra e figura do autor de Rianxo na programación paralela á feira, que se desenvolveu no Centro Galicia e no Instituto arxentino-galego Santiago Apóstol.

Finalmente, dentro da proxección internacional do Ano Castelao en Bos Aires, organizouse unha ruta polo centro da cidade para revisar os momentos relevantes da biografía de Castelao e o seu estreito vencello coa capital arxentina. A isto sumaránselle outras actividades, entre as que se atopan clases presenciais sobre o autor de Sempre en Galiza na Facultade de Filosofía e Letras. 

Proxección nos Estados Unidos, O Brasil, Alemaña ou Hungría

Esta acción do Ano Castelao na capital da Arxentina complementa a promoción realizada a medidos de abril na cidade estadounidense de Nova York, onde participou o secretario xeral da Lingua, Valentín García, e que se estenderá ao Brasil, Alemaña ou Hungría abordando a vida e obra de Castelao desde moi diferentes perspectivas e propostas variadas.

Por outro lado, o Centro de Estudos Galegos de Bahía proxectará un audiovisual sobre a súa figura, mentres que en Sao Paulo daranse a coñecer a investigación da profesora Valeria Gil. Xa en Europa, o Centro de Estudos Galegos de Budapest ofrecerá varias conferencias sobre Castelao relacionadas coa identidade galega e a lingua. 

En Heildeberg programarán unha sesión especial con diversas actividades sobre a figura e obra do homenaxeado co fin de comprender mellor o seu contexto histórico. Mentres, en Kiel centrarán as súas propostas en repasar os capítulos que se refiren a Alemaña do Diario 1921 no que Castelao plasmou as súas impresións na viaxe que fixo a este país, xunto con Francia e Bélxica.