Congreso Europeo de Turismo Rural en Chinchón, na Comunidade de Madrid

A directora de Promoción de Turismo de Galicia, Carmen Pita, está a participar estes días no Congreso Europeo de Turismo Rural Coetur 2025, organizado pola plataforma EscapadaRural.com que ten lugar na cidade de Chinchón, na Comunidade de Madrid. Durante o encontro, que remata hoxe, analízanse en distintas mesas de traballo, as últimas propostas en materia de promoción e innovación desta oferta turística nos destinos nacional e autonómicos.

En concreto, Carmen Pita participou na mesa que levou por título ‘Como aproveitar a demanda internacional dos nosos destinos rurais’ e compartiu experiencias con responsables turísticos de Turespaña e das comunidades de Madrid e Euskadi. Durante a súa intervención, a directora de Promoción salientou que Galicia pechou o pasado ano cun peso do 30% do turismo internacional e do 56% dos peregrinos que fixeron o Camiño de Santiago. Ademais, lembrou a aposta da Xunta pola promoción cun plan de acción en máis de 30 mercados e 130 accións específicas.