Lorenzana viaxa mañá a Bruxelas nunha semana decisiva para o sector da automoción

A conselleira de Economía e Industria, María Jesús Lorenzana, inicia mañá unha viaxe a Bruxelas coincidindo coa presentación, o vindeiro mércores, do plan de actuación que a Comisión Europea anunciou para o sector da automoción.

Na axenda de reunións que leva prevista para os dous días de estancia na capital belga, a conselleira vai ter ocasión de participar na recepción anual da Asociación Europea de Fabricantes de Automóbiles (ACEA), que agrupa toda a patronal do sector, entre os que figura Stellantis. Precisamente hoxe mesmo, a presidenta da Comisión Europea, Ursula von der Leyen, anunciou que se vai ampliar de un a tres anos o calendario de redución de emisións ao que están obrigados os fabricantes europeos para acadar os obxectivos fixados, unha medida da que se van coñecer máis detalles o vindeiro mércores e que Lorenzana terá ocasión de abordar neste encontro anual no que se dan cita as principais marcas do sector.

Esta é a terceira ocasión en que a titular de Economía e Industria aborda no seo da Unión Europa as principais problemáticas desta industria que é estratéxica en Galicia para solicitar unha acción conxunta desde as institucións comunitarias na súa defensa. Fíxoo o pasado mes de novembro en Monza, na III Conferencia Anual da Alianza de Rexións Europeas con Industria da Automoción (ARA) e, hai apenas unhas semanas, nun encontro co comisario de Mobilidade Sustentable e Turismo da Comisión Europea, Apostolos Tzitzikostas.

En ambos os dous casos, Lorenzana reclamou ao Executivo europeo que actúe sobre catro ámbitos que son clave para o sector; entre eles, o normativo, ao considerar indispensable que, tal e como agora se anunciou, se flexibilicen os regulamentos de emisións e se dean prazos máis amplos, así como que se revisen as sancións impostas ás empresas. Xunto con isto, lembrou que a Xunta de Galicia tamén vén reclamando cambios na normativa comunitaria para ampliar o acceso ás axudas a toda a cadea de valor e para pedir máis simplificación administrativa.

A axenda da conselleira en Bruxelas será eminentemente de carácter industrial, posto que contempla, ademais doutros encontros, unha xuntanza co director xeral de Industria da Defensa e o Espazo, Timo Pesonen.