O avance do informe do CEDEX sobre as zonas de depósito dos áridos para a dragaxe do Lérez sinala como alternativa prioritaria o punto de Sálvora que o estado paralizou en 2021

A Xunta de Galicia vén de recibir o avance do informe técnico do CEDEX, organismo técnico de recoñecido prestixio dependente do Goberno central, en relación á proposta de puntos de depósito dos áridos procedentes das dragaxes das Rías Baixas, nomeadamente a do Lérez, en Pontevedra. Este informe recolle nas súas conclusións que o punto E8, coñecido comunmente como punto exterior de Sálvora, “deberá ser considerado prioritario sobre outras alternativas”.

Este punto é o mesmo que se viña empregando ata abril de 2021 cando o MITECO decidiu non autorizar ningún novo depósito nel á espera dun estudio de alternativas, paralizando a tramitación de todas as dragaxes do sur de Galicia. En concreto son 16 os proxectos de dragaxe cuxa tramitación se atopa paralizada a día de hoxe á espera de informe favorable do MITECO para o depósito de áridos.

Nas súas recomendacións, o informe do Centro de Estudios e Experimentación de Obras Públicas, considera o punto E8 como “o máis axeitado para recibir os materiais dragados dos portos ubicados nas rías de Arousa e Pontevedra ou de calquera porto cuxa distancia non exceda as 20 millas náuticas”. Así mesmo o informe valora como adecuados os outros dous puntos propostos pola Xunta de Galicia, denominados B e D.

O informe do CEDEX non supón unha autorización directa para depositar áridos no punto E8 nin nos outros dous senón que será o MITECO quen deberá autorizar o depósito en base a dito informe.