A Xunta ofrece ampliar o permiso de maternidade e paternidade a todo o persoal da Administración de Xustiza

A Xunta ofrece ampliar o permiso de maternidade e paternidade aos funcionarios da Administración de Xustiza, que pasarían de 16 a 20 semanas, e de 29 días a 5 semanas, respectivamente.

Na reunión co comité de folga do persoal da Administración de Xustiza, a Xunta amosou de novo a súa vontade negociadora e ofreceu unha nova mellora: a ampliación tanto do permiso de maternidade como do de paternidade, sendo trasladada esta mellora no documento entregado onte ás organizacións sindicais.

O permiso de maternidade establecido na normativa básica do emprego público do Estado é de 16 semanas, e a partir de agora terán 20 semanas más 2 de preparto. Desta ampliación do permiso de maternidade poderá beneficiarse tanto o pai como a nai que sexan empregados públicos. En canto ao permiso de paternidade, actualmente é de 29 días segundo á lexislación básica do Estado sendo ampliado este permiso ata as 5 semanas, como recolle a Lei de Emprego Público de Galicia.

En consecuencia, a medida que agora se adopta por parte do Goberno galego, sitúa aos funcionarios xudiciais á cabeza de todas as comunidades autónomas en conciliación por maternidade e paternidade na administración de Xustiza, xa que o período de conciliación familiar retribuída dos persoal da Administración de Xustiza galega, situarase na media dos 5 meses.

Ademais, a Xunta recolle no mesmo documento o ofrecemento para incrementar a contía do complemento autonómico transitorio por riba da media do resto de comunidades autónomas, o que se traduce nunha suba global de entre 660 e 900 euros ao ano, en función do corpo. A administración autonómica tamén trasladou o seu compromiso de converter en fixos os postos que levan máis de tres anos con contratos temporais.

A maiores, a Xunta ofreceu melloras adicionais en materia de violencia de xénero. Estas melloras pasan pola creación de 7 prazas de psicólogo para os servizos de atención ás vítimas existentes nas sete cidades galegas; o reforzo de persoal nos xulgados de violencia sobre a muller naqueles casos nos que sexa necesario pola súa carga de traballo; e o establecemento dun complemento lineal por obxectivos ligados ao traballo en violencia de xénero, que se traducirá no pagamento dunha cantidade aos funcionarios dos xulgados de violencia de entre 50 e 100 euros ao mes, en función do tipo de xulgado.