O recinto feiral da Semana Verde acolle o Campionato Zonal de Campo a Través do Deza

O Campionato Zona de Campo a Través para escolares da comarca do Deza volve a retomarse. A cita celebrarase mañá no recinto feiral da Fundación Semana Verde de Galicia, en Silleda, a partir das 11.00 horas.

No certame participan un total de seis centros: o CEIP da Bandeira, CEIP de Silleda, CEIP de Vila de Cruces, CEIP de Vilatuxe, CEIP de Prado e o Colexio Plurilingüe María Inmaculada. A proba establece tres categorías para o alumnado de Primaria: Benxamín (alumnos/as de 3º); Alevín (4º e 5º) e Infantil (alumnos/as de 6º). Haberá premios para os tres primeiros clasificados de cada unha delas.

Na de Benxamín a distancia a percorrer será de 500 metros, na de Alevín de 600 metros no apartado feminino e 800 para o masculino, e na de Infantil, de 800 e 1.200 metros, respectivamente.

En total participarán no certame arredor de 300 alumnos e alumnas que celebrarán unha xornada de convivencia arredor desta modalidade deportiva, organizada polo profesorado dos centros.

O obxectivo da proba é inculcar valores de convivencia, respeto e compartir esta xornada que se recupera agora logo de varios anos sen celebrarse.

“O importante é que todos os nenos e nenas participen”, indican dende a organización deste evento, que se iniciará ás 11.00 horas coas probas na categoría de Benxamín.