A Xunta amosa o día a día das persoas con síndrome de Down nunha mostra ao abeiro do proxecto CapacitARTE do Cermi
O edificio da Xunta en San Caetano acolle desde mañá unha nova exposición no marco da iniciativa CapacitARTE, unha mostra a prol dunha Galicia inclusiva e igualitaria que promove a Administración autonómica e Cermi Galicia. Nesta ocasión tócalle a quenda a Down Galicia, que amosa a través de imaxes o día a día deste colectivo, así como as actividades e programas que se desenvolven baixo o paraugas desta entidade social.
O Goberno galego ten entre as súas prioridades sociais avanzar na procura da igualdade, a non discriminación e a accesibilidade universal. Froito deste compromiso, en 2018 incrementáronse nun 8%, os orzamentos destinados ás persoas con discapacidade, ata situarse nun total de preto de 103 millóns de euros.
Desde a Consellería de Política Social se avoga por seguir estreitando a colaboración coas entidades e sumando esforzos para multiplicar os resultados en prol da inclusión. Ao mesmo tempo que se salienta o papel do Cermi e do conxunto do tecido social da comunidade polo seu traballo de sensibilización coa sociedade para que esta siga avanzando no recoñecemento da valía das persoas con discapacidade.