O primeiro temporal do inverno deixa unha ringleira de pequenas incidencias en Pontevedra

Coa chegada do primeiro temporal do inverno, os servizos de emerxencia do Concello foron postos en pre alerta, situación na que estarán até que as previsións meteorolóxicas o indiquen. “Temos un protocolo de actuación moi engraxado” subliña a concelleira de Protección Cidadá, Carme da Silva que deu conta das incidencias rexistradas -todas elas pequenas incidencias- nas últimas horas a causa das intensas chuvias e o forte vento.

Os servizos de emerxencia municipal están coordinados pola Policía Local. Forman parte do operativo ademais da propia Policía local, os Bombeiros, Protección Civil, o servizo de Xardíns e as empresas concesionarias de servizos e mantemento municipal que teñen o equipamento e maquinaria precisa para enfrontar as incidencias propias do servizo que prestan. Falamos de Viacqua (agua), Ferrovial (para traballos de limpeza), Setga (incidencias eléctricas), e E Casas (que ten o contrato de mantemento).

Incidencias da maña:

– caída dunha árbore na rúa Francia de Monte Porreiro

– desprendemento de terra no vial que vai de Alba a Campaño, que afectou a un carril de circulación

– caída dunha árbore no xardín ao carón do colexio Campolongo

– caída dun sinal de circulación na glorieta de Loureiro Crespo- 12 de Novembro

– corte do camiño de acceso á cascada de Monte Porreiro por caída de árbores – dende Reino Unido ata a Cascada. Permanecerá pechado até despois do temporal xa que hai risco de caída de máis árbores

– caída de tellas dun inmoble da rúa Benito Corbal.

A concelleira de Protección Civil lembra as recomendacións de seguridade habituais en situacións de alerta por temporal co fin de evitar que posibles incidencias causen danos persoais. Non son outras que:

evitar no posible os desprazamentos en vehículo

limitar os desprazamentos a pé aos necesarios ante o risco real de desprendementos de elementos aéreos chegado o caso, atender as indicacións dos profesionais dos servizos de emerxencia