A reforma do Edificio de Usos Múltiples de Teixeiro comezará en setembro
As obras de rehabilitación do Edificio de Usos Múltiples de Teixeiro para optimizar a súa funcionalidade e adaptalo mellor ás actividades socioculturais que nel se desenvolven comezarán o próximo mes de setembro.
Ao orzamento da reforma, de 67.000 euros a cargo do Plan de Acción Social provincial, súmaselle a achega de 35.000 euros para a adquisición de equipamento por parte da Consellería de Cultura en virtude dun acordo asinado esta semana entre o alcalde de Curtis, Javier Caínzos, e o conselleiro Román Rodríguez.
No convenio destácase o papel que xogan estas dependencias municipais na programación anual de numerosas actividades tanto por parte do Concello como das asociacións veciñais. De feito, a rehabilitación do inmoble foi incluída nos orzamentos de Curtis para este ano como proposta presentada polos veciños nos procesos abertos de participación cidadá.
A Consellería de Cultura resalta, ademais, a importancia de que o Edificio de Usos Múltiples ofreza un servizo permanente durante todo o ano á poboación do concello curtiense así como dos municipios limítrofes.
As obras neste edificio pretenden dotalo de novos espazos que permitan unha maior polivalencia das súas instalacións. O fin é dispor dunha nova aula para cursos, unha segunda sala de usos varios, máis entradas ao edificio e aseos accesibles. A reforma incluirá o salón de actos para aumentar a súa capacidade.