A Policía Autonómica investiga o presunto autor dun incendio forestal en Narón

Axentes da Policía Autonómica da Coruña informaron hoxe da investigación dun home como presunto autor dun incendio forestal no concello de Narón, na Coruña, o pasado 11 de agosto.

A orixe do incendio foi o lanzamento de artefactos pirotécnicos de xeito neglixente, xa que os restos caeron nunha zona de combustible inflamable. A rápida intervención dos medios de extinción do parque de bombeiros de Narón evitou que as lapas puxeran en perigo as vivendas próximas ao incendio, que afectou a 300 metros cadrados de monte arborado.

Polos feitos instruíronse dilixencias que foron remitidas ao Xulgado de Garda da Coruña. Na actual campaña antiincendios, a Policía Autonómica xa leva 44 persoas investigadas ou detidas por delitos relacionados con incendios forestais.