Máis de 100 xogadores participan no IV Campus de Baloncesto Joe Arlauckas de Tui

Presentación do Campus

Arredor de 100 xogadores e xogadoras  procedentes das canteiras de equipos galegos e portugueses pertencentes a equipos ACB, ADECCO e LEB, participan dende o pasado luns, e até este sábado, no IV Campus de Tecnificación de baloncesto Joe Arlauckas de Tui.

O Concello de Tui presentou hoxe, ás 12.30h. no Parador de Tui, o IV Campus de Baloncesto Joe Arlauckas. O acto contou coa presenza do alcalde de Tui, Enrique Cabaleiro, do concelleiro de Deportes Laureano Alonso, do ex baloncestista e representante do Campus Joe Arlauckas, da baloncestista, Elena de Alfredo, ademais do presidente do CB Tui, Juan Cal e do responsable da organización do Campus, Ismael Rodríguez.

O Campus dispón sesións de adestramento de mañá e de tarde, tanto colectivos como individuais, ademais de práctica de tiro, defensa, mellora do xogo de costas ao aro, etc. O Campus tamén se complementará con mini-ligas de verán, concursos deportivos, actividades recreativas, charlas con profesionais do baloncesto, encontros con axentes de xogadores, etc. 

O alcalde de Tui, Enrique Cabaleiro, agradeceu o labor e felicitou a todos os que traballaron por facer posible a cuarta edición deste evento deportivo e prometeu nun futuro, un maior esforzo económico por parte do Concello. Asemade, quixo trasladar o convite a todos os veciños e veciñas de Tui a que acudan a ver o Campus e asistan ás actividades. 

Pola súa banda, Laureano Alonso explicou que este Campus se trata dun dos eventos máis destacados do panorama deportivo tudense e que servirá para que os cativos se familiaricen coa práctica deportiva no baloncesto. 

Dende o CB Tui deron conta que o Campus creceu exponencialmente en todo este tempo, xa que hai tres anos contaban con 30/40 nenos participantes e arestora xa son 100, procedentes tanto da contorna, como de Portugal. Tamén quixeron destacar que os obxectivos de realizar este Campus pasan porque os mozos aprendan as técnicas do baloncesto e se divirtan; que o nome de Tui estea no mapa do baloncesto a nivel estatal e que o Campus se sitúe como referente no panorama nacional. 

O Campus está dirixido polo ex xogador da NBA e do Real Madrid Joe Arlauckas, xunto a un equipo de adestradores superiores como Rafa Monclova (Sevilla Baloncesto), Cesar Iglesias (Selección Galega), José Miguel González e Miguel Ángel Simón (C.B. Tui) e da fisioterapeuta Marta Zurro (Selección absoluta de Angola e Selección de Castela e León). 

Para mañá o Campus recibirá a visita de Pepe Casal, ex preparador físico de Pau Gasol, Juan Carlos Navarro, Tamara Abalde ou Nuria Martínez, adestrador do Obradoiro CAB no 1º ascenso a Liga ACB, e ex preparador físico das Seleccións FEB. Estará no Campus para dar unha charla-conferencia sobre preparación física, será no salón de actos do Seminario Menor de Tui. Tamén contarán coa presenza o venres pola mañá do xogador do COB Ourense Salva Arco.