O Santiago Futsal vai a Xaén pola cuarta vitoria

O Santiago Futsal, que xa se atopa en terras xienenses, tentará conseguir mañá ás 21h a cuarta vitoria consecutiva en Liga que permita consolidarse nos postos seguros da táboa.

O conxunto de Santiago medirase mañá a un Jaén Paraíso Interior que non coñece a derrota esta tempada. No que levamos de Liga, os andaluces empataron dous encontros e gañaron catro, o que lles fai asentarse na 3ª praza da clasificación, tras Inter e Barcelona, e empatado a punto co Pozo. A xornada pasada logrou superar ao Levante Dominicos por 4 a 0.

Pola súa banda, o Santiago Futsal, chega ao encontro moi motivado, tras sumar a terceira vitoria consecutiva en Liga, cuarta en total sumando a clasificación de Copa ante o Noia F.S (2-3). A semana pasada, nun partido moi completo e de gran despregamento defensivo, derrotou ao Uruguai Tenerife por 5 a 1.

Se botamos a vista atrás, no partido da tempada pasada entre ambos os conxuntos, o resultado foi de empate 1-1. O gol desde o tiro de 10 metros de Buendía, foi igualado por David Pazos na segunda parte. Agora, tanto locais como visitantes, apenas conservan os xogadores que disputaron aquel encontro, e veranse as caras nun choque que, a priori, prevese emocionante e de gran expectación.

O Santiago Futsal non viaxou con Lucas Bolo, concentrado coa selección arxentina para disputar a Copa Continental de Kuwait, nin Kristijan Postruzin “Kike” que se atopa coa selección crota Sub-21, nin Loito, que segue co proceso de recuperación da lesión de xeonllo. Si viaxou o internacional Diego Quintela.