As cámaras de seguridade da zona do atentado de Baralla son revisadas polos Corpos de Seguridade do Estado

Axentes das Forzas e Corpos de Seguridade do Estado proceden a revisar o contido das cámaras de seguridade situadas na zona do Concello de Baralla (Lugo), onde esta madrugada se rexistrou unha explosión que provocou importantes danos na casa do concello e en vivendas e locais próximos.

Fontes da investigación indicaron que as imaxes que se recompilen servirán para apuntalar a tese de que o artefacto explosivo foi colocado por máis dun terrorista, dado que barallan que polo menos un individuo quedaría nun vehículo para abandonar o lugar despois de que outra persoa colocase o artefacto explosivo nos soportais da casa do concello.

A detonación provocou que a planta baixa do Concello de Baralla quedase totalmente “rebentada”, mentres que na segunda planta se rexistran danos. Hai un ano, o 7 de outubro de 2013, un artefacto explosivo tamén destruíu o Concello de Beade (Ourense).

As similitudes con aquel episodio e o modus operandi levan ás autoridades a indicar que “todo apunta” a que se trata dun atentado de Resistencia Galega, perpetrado cun artefacto explosivo composto por entre tres e cinco quilos de pólvora contidos nunha pota a presión.

O alcalde de Baralla, Manuel González Capón, do PP, protagonizou algunhas polémicas por declaracións relacionadas co franquismo, como afirmar que “os que foron condenados a morte” durante o réxime de Franco “sería porque o merecían”, durante un pleno municipal celebrado en 2013 no que se condenaron os actos de Resistencia Galega. Pola súa banda, o alcalde de Beade (Ourense), o popular Senén Pousa Soto, é coñecido por definirse como franquista.

Non obstante, o rexedor de Baralla xa desvinculou o atentado deste mércores da polémica xerada no seu momento polas súas declaracións, polas cales acabou por desculparse. Ao respecto, indicou que el entende que “non ten ningún tipo de relación” e agregou que “non hai nada que poida xustificar” o emprego da violencia nun país democrático e contra “os que non teñan a mesma opinión que ti”.