Tras reabrir durante hora e media volve estar pechado pola néboa o tramo da A-8 no que houbo a colisión múltiple

O tramo da A-8 no que se produciu o sábado unha colisión múltiple entre Abadín e Mondoñedo, na provincia de Lugo, permanece pechado este mércores por motivo da néboa despois de que se reabrise ao tráfico ás 21,30 horas do martes para volver pechalo hora e media despois.

Diso informaron fontes da DGT, que sinalaron que este tramo da A-8 non se reabrirá ata que se disipe a néboa e haxa máis visibilidade.

Este tramo permaneceu pechado ao tráfico dende que o sábado se produciu o sinistro no que se viron implicados medio centenar de vehículos e no faleceu unha muller. Tan só se reabriu entre as 21,30 e as 23,00 horas do martes, pero a densa néboa obrigou a cortar de novo a vía.

Ademais da retirada dos vehículos e a reparación de balizas e quitamedos, o Ministerio de Fomento realizou labores de reparación no firme da vía, que quedara danado tras o sinistro.

Por outra banda, o departamento que dirixe Ana Pastor informou de que ao longo de próximos días se irán instalando diversas medidas de seguridade adicionais entre Mondoñedo e A Xesta como balizas de néboa e sinais de alta reflectancia.

Tamén se activarán paneis de mensaxes e estacións meteorolóxicas adicionais, que se sumarán ás medidas existentes, debido ás “condicións adversas, especialmente néboa e vento” da zona.