Frades afronta a última fase de desbroce de 600 kms de pistas municipais

O Concello de Frades afronta a última fase dos traballos de desbroce das súas pistas municipais, así como de limpeza e acondicionamento das áreas recreativas do municipio. Uns traballos que se concentran esta semana na parroquia de Mesos, despois dos realizados nas parroquias de Abellá, Aiazo, Añá, Gafoi, Ledoira, Moar e Vitre. Deste xeito, quedarán tan só as pistas asfaltadas das parroquias de Céltigos, Frades, Galegos e Papucín, que “agardamos ter rematado a principios de agosto”, explica Manuel Ferreiro, concelleiro de Limpeza Viaria.

Manuel Ferreiro explica que “o Concello de Frades iniciou o desbroce a principios do mes de maio e xa levamos feito máis do 50% das pistas asfaltadas. Iniciamos os traballos polas pistas de aglomerado que cruzan o concello e despois pasamos a facer parroquias completas, tendo en conta as datas das festas das distintas parroquias”. Paralelamente, Ferreiro Marzoa explica que “neste mes de xullo empezaremos o desbroce das pistas de monte, que se alongará ata o inverno. A finais de ano teremos desbrozado uns 600 quilómetros de pistas”.

Así mesmo, o Concello de Frades vén de rematar a limpeza e acondicionamento das distintas áreas recreativas e espazos naturais do municipio para o seu uso e desfrute durante a tempada estival. “Manter en bo estado o patrimonio paisaxístico do concello é unha das prioridades do equipo de Goberno, tanto para disfrute dos nosos veciños como para atraer a xente doutros municipios”, indica o concelleiro de Limpeza Viaria.