publicidade hoxe
Publicidade
omeulibro1

O goberno de Ames informa sobre as reclamacións que poden presentar os veciños que tiveron cortes de luz

PUBLICADO EN: Noticias de GaliciaAmes
A-
A+

Durante o pasado fin de semana producíronse numerosos cortes no subministro eléctrico, que afectaron directamente ao desenvolvemento normal de tarefas cotiás e básicas. Dende o Concello de Ames informan á veciñanza de que teñen a posibilidade de facer unha reclamación oficial. As reclamacións deben ir dirixidas ao departamento de atención ao cliente da empresa que comercializa a enerxía eléctrica, cuxos datos se poden ver en calquera das facturas que chegan ao seu domicilio dos veciños. De non atenderse dita reclamación nun prazo de 30 días, existe a posibilidade de exercer accións legais.

Premendo na ligazón que está a túa dereita, baixo o apartado de descargas, poderás obter o modelo que elaborou a Unión de Consumidores de Galicia (UCGAL) e que pon a disposición do Concello de Ames. Neste modelo débese encher os apartados correspondentes á empresa comercializadora que ten contratada, os datos persoais e os do contrato. Asemade, deberá indicar as horas e días nos que estivo sen subministro e, de ser o caso, si sufriu algún tipo de avaría indicar o tipo da mesma axuntando a factura e fotos correspondentes. Por último haberá que asinar a reclamación.

Os veciños e veciñas que decidan poñer unha reclamación deben facelo de xeito que quede constancia de dita reclamación. É dicir poden facelo de xeito presencial xa que lle darán unha copia da reclamación presentada, enviando un burofax ou por correo certificado. Nos dous últimos casos tamén disporán dun xustificante que acredita a presentación da reclamación. Outra opción é facelo por correo electrónico, pero sempre e cando se envíe con acuse de recibo.

Unha vez enviada a reclamación á empresa correspondente, e co obxectivo de poder levar un control, dende o Concello solicítase que se envíe copia da mesma, ben por correo electrónico a atencioncidada@concellodeames.gal, ou presencialmente na oficina de atención veciñal do Concello.

O modelo de reclamación poderá descargarse na web municipal ou pasar a recollelo nas oficinas municipais do Milladoiro e Bertamiráns. Para calquera dúbida poderán poñerse en contacto co departamento de atención cidadá ou co departamento de promoción económica chamado ao número de teléfono 981 88 30 02 (extensións 2004 ou 2010).

Consultas individualizadas de cada caso

É importante que os veciños e veciñas que queiran facer algunha consulta nas oficinas de consumo sobre este tema ou calquera outro, soliciten cita previa para dispor deste servizo que ofrece a Unión de Consumidores de Galicia tanto en Bertamiráns coma no Milladoiro. Así poderán facer unha consulta personalizada e individual sobre cada caso en particular. Para solicitar información e pedir cita previa hai que chamar ao número de teléfono 662 13 03 12.

Deste xeito, os técnicos da UCGAL atenden ás persoas consumidoras do Milladoiro, nas instalacións da rúa Viorneira, número 6, baixo, os luns de 10:00 a 14:00 horas, e os martes de 10:00 a 14:00 horas e de 16:30 a 20:30 horas. En Bertamiráns, as oficinas están situadas no Pazo da Peregrina e a atención ao público realízase os mércores de 16:30 a 20:30 horas, e os xoves de 10:00 a 14:00 horas e de 16:30 a 20:30 horas.

8 de febreiro de 2017 | 17:30 • Sen comentarios

Comentarios pechados.