A Xunta achega as vantaxes do cooperativismo a estudantes de ciclo formativo en Ames

A secretaria xeral de Emprego, Covadonga Toca, acompañou hoxe en Ames a un grupo de estudantes do Ciclo Formativo do IES Leixa de Ferrol na visita que realizaron ás instalacións do Centro Rede Eusumo Fundación Feiraco de Ponte Maceira para coñecer de primeira man as vantaxes do cooperativismo.

Os alumnos e alumnas participaron no obradoiro ‘Emprendemento e Cooperativas. Modelo de éxito’, unha actividade que promove a Consellería de Economía, Emprego e Industria, a través da Rede Eusumo. A secretaria xeral de Emprego animou aos participantes nesta actividade a coñecer os valores desta fórmula empresarial e da Economía Social, en xeral, un sector que aglutina a máis de 7.000 entidades e 320.000 persoas.

Unha das prioridades da Axenda 20 para o Emprego, a nova planificación da Xunta no eido laboral, é impulsar o cooperativismo. Esta folla de ruta reforza os incentivos ao cooperativismo e impulsa a competitividade e internacionalización do sector. “O que se pretende é incrementar o tamaño das cooperativas para dotalas dunha maior capacidade industrial e loxística que lles axude a competir”, subliñou Toca. A Xunta destina este ano 5,4 millóns de euros para fomentar a Economía Social con diferentes liñas de axudas entre as que a Axenda 20 inclúe o Programa Aprol para promover a contratación do sector con preto de 3 millóns de euros.

O Goberno galego está a ultimar a Estratexia para o impulso do cooperativismo galego 2016-2020, que inclúe un total de 87 medidas co obxectivo de potenciar a competitividade e internacionalización deste sector. Ademais, recentemente, aprobouse o Proxecto de Lei de Economía Social de Galicia que ten como principal obxectivo regular ao sector, promovendo especialmente o cooperativismo xuvenil e ofrecendo grandes posibilidades para contribuír ao crecemento económico de Galicia desde o rural.

En definitiva, a secretaria xeral de Emprego indicou que a Xunta pretende potenciar ás empresas de Economía Social polo seu compromiso co territorio, fomentando as de base tecnolóxica e innovadora e de emprendemento industrial con atención ás destinadas ao rural.

Durante 2016 xa son preto de 20 os centros educativos que teñen participado nos obradoiros de ‘Emprendemento Cooperativo Eusumo’ organizados pola Rede Eusumo que promove a Consellería de Economía, Emprego e Industria co obxectivo de achegar esta fórmula empresarial aos máis novos. De feito, hoxe tamén participaron nesta iniciativa alumnos do IES Castro de Baronceli, en Verín, que visitaron o Centro de Desenvolvemento Cooperativo Transfronteirizo.