Lobocoxo organiza un decembro cargado de contos e obradoiros para os máis pequenos

O Espazo Lobocoxo organiza neste mes de decembro varias sesións de contos todos os sábados e domingos ás 12 horas e con entrada de balde. Este sábado 12 será a quenda da presentación do libro de Oli e Ramón Trigo O rato avó e o muraño, publicado pola editorial Xerais. Nesta sesión haberá contos e debuxos e Ramón Trigo impartirá un obradoiro de ilustración para os nenos e nenas que se acheguen.

Seguen os contos o sábado 19 cunha sesión dedicada ao Nadal. Con motivo da chegada destas datas tan desexadas polos nenos, contaranse contos con mazapán, contos quentiños, sobre o Nadal, cunha especial mención á figura do Apalpador que nesas datas xa estará baixando do Courel.

E para rematar o mes, o sábado 26 haberá contos de historias, diferentes, distintas: contos grandes e pequenos, contos sen palabras, contos con moitas letras, contos con imaxes e sen elas… Estes contos especiais combinaranse cun obradoiro de plástica creativa da man do ilustrador Marc Taeger.

Ademais todos os domingos ás 12 horas haberá na casa do LOBOCOXO contos para bebés de 0 a 3 anos de idade. E para os que desexen aprender plástica e arte, Marc Taeger dirixe durante todas as vacacións uns obradoiros moi interesantes cun custe de 5 euros por día, incluído o material. Os horarios son os luns e martes de 10 a 11 para nenos/as de 4 a 6 anos, e de 11.30 a 13 h para os de 6 a 10 anos; e os mércores polas tardes de 17 a 18 para os de 4 a 6 anos, e de 18.30 a 20 para os de 6 a 10 anos.