Preséntase en Santiago a Asociación Galega de Corea de Huntington para dar apoio a pacientes e familiares

A Asociación Galega de Corea de Huntington preséntase este sábado 24 de outubro en Santiago como rede de apoio aos pacientes e familiares de toda Galicia. A presentación acompañarase dunha sesión informativa sobre as últimas novidades en investigación médica e técnicas de reprodución asistida para conseguir erradicar esta enfermidade dexenerativa hereditaria nas próximas xeracións.

A presentación enmárcase nas actividades de conmemoración do 25ª aniversario da Asociación Corea de Huntington Española e conta coa colaboración con Complexo Hospitalario Universitario de Santiago de Compostela (CHUS).

O acto, de acceso libre, terá lugar o 24 de outubro ás 16:15 horas no Salón de Actos do CHUS. Os asistentes poderán coñecer os servizos e terapias que ambas as asociacións prestarán para manter a calidade de vida dos enfermos de Huntington e apoiar aos seus familiares.

A sesión informativa estará a cargo dos doutores Ángel Sesar, neurólogo do CHUS, e Maria Graña, do Centro de Reprodución Asistida Zygos, xunto con Ana Ruiz, terapeuta ocupacional do Centro de Dano Cerebral Sarela. Todos eles serán presentados pola presidenta da Asociación Corea de Huntington Española, Ruth Blanco. 

Máis de 4.000 casos en España

A enfermidade de Huntington é a 3ª patoloxía neurodexenerativa máis importante tras o Alzheimer e o Parkinson. A pesar de que se estima que a padecen máis de 4.000 persoas en España e máis de 15.000 están en risco de desenvolvela debido ao seu carácter hereditario e incurable, aínda é moi descoñecida. Os seus síntomas, gravemente incapacitantes e de carácter progresivo, aseméllanse á unión do Parkinson, a ELA e o Alzheimer, coa diferenza de que os seus síntomas se inician sobre os 35-45 anos e que o seu prognóstico vital é duns 15-20 anos.

A Asociación de Corea de Huntington Española (ACHE) naceu en 1990 como unha entidade de carácter nacional que agrupa aos afectados pola enfermidade de Huntington. Traballa en defensa dos seus dereitos e necesidades en todos os ámbitos e proporciona semanalmente servizos e terapias non farmacolóxicas que melloran a calidade de vida destes enfermos e dos seus familiares.