O GAC 6 organiza dous cursos de formación no sector pesqueiro en Bueu

O Grupo de Acción Costeira 6, correspondente á ría de Pontevedra, organiza en novembro dous cursos de formación gratuítos para varios concellos da área, entre os que está Bueu . Para os que desexen realizar trámites en liña desde ordenador e móbil para xestión de produtos do mar, do 26 de outubro ao 23 de novembro de 18:15 a 21:30 vaise celebrar na Praza de Abastos de Bueu un curso de “MARTICs: E-administración para a xestión e comercialización de produtos do mar”. Neste curso aprenderase a tramitación electrónica do DNI-e e co certificado dixital, a xestión e comercialización on line da actividade pesqueira e marisqueira, e a visibilidade dun negocio nas redes sociais.

Este curso vai preferentemente dirixido a minoristas de produtos pesqueiros, mariscadoras/es, armadores/as, persoal de lonxa, e outros, e xa completou o número de participantes na primeira semana de inscrición.

E o 6 de novembro de 16.30 a 20.30 e o sábado 7 de 10 a 14 horas desenvolverase un curso sobre “Escabeches e mariñados” que se enmarca dentro do programa “Gacstroexperiencias culinarias”.