publicidade hoxe

Os veciños de San Sadurniño poderán fraccionar o pagamento dos recibos atrasados da contribución

PUBLICADO EN: Noticias de GaliciaSan Sadurniño
A-
A+

O Concello de San Sadurniño iniciou en 2012 un proceso de regularización catastral co obxectivo de incorporar ao Catastro Inmobiliario tanto as novas construcións como aquelas ampliacións ou modificacións que se produciran e que non foran declaradas polos seus propietarios tal e como esixe a normativa. Foi un proceso longo polo número de altas que se tramitaron -máis de 300- e pola propia complexidade de incorporar os datos de campo -situación exacta, medidas, etc.-, ao que se uniu unha deficiente coordinación entre o Catastro e a Deputación, que ten delegado o cobro do IBI. O resultado é que desde hai algunhas semanas están comezando a chegar ás casas os recibos atrasados da contribución que, nalgúns casos, sinalan unha contía difícil de asumir dunha soa vez para algúns fogares. Neste sentido desde o Concello infórmase que o pagamento dos recibos atrasados pode facerse fraccionado ata e en 12 meses sempre e cando non existan débedas pendentes coa Deputación. A solicitude do fraccionamento pode facerse no rexistro municipal, aínda que se aconsella acudir directamente ás oficinas provinciais de recadación en Ferrol ou en Narón. O prazo para solicitar o fraccionamento en periodo voluntario finaliza o 15 de setembro.

Durante o 2012 moitos veciños e veciñas solicitaron a regularización das modificacións que sufriran as súas propiedades, ben por ter feito obras novas nelas ou ben por ter acometido restauracións ou ampliacións. Unha circunstancia que fai aumentar o valor catastral dos inmobles e, polo tanto, o que se paga de contribución por eles a pesar de ter San Sadurniño unha ponencia de valores -a base sobre a que se calcula o imposto- das máis baixas da comarca. 

A cuestión é que a regularización e o conseguinte aumento do valor catastral -que o Catastro lle comunicou aos titulares do ben dándolles un prazo para reclamaren se non estaban de acordo- se aplican con efecto retroactivo desde que se produciron as modificacións, e non desde que se solicitou esa regularización. É dicir, a quen regularizase en 2012 unha obra rematada en 2009 comunicouselle en primeiro lugar o cambio de valoración contra o que puido alegar o que estimase conveniente e, máis recentemente, chegoulle a comunicación do que debe pagar… e non desde 2012, senón desde 2009 tal e como esixe a lei.

O efecto retroactivo da regularización por unha banda e os retrasos que se produciron na tramitación por outra motivaron que agora cheguen os atrasos todos xuntos ata o máximo de 5 anos que permite a normativa. Na maioría das algo máis de 300 regularizacións solicitadas o importe destes atrasos son cantidades relativamente pequenas -entre 100 e 200 euros- pero tamén hai casos, os menos, en que as contías son moi superiores, chegando incluso nun deles aos 2.255 euros. 

Sexan cantidades grandes ou pequenas, os veciños e veciñas que recibisen a comunicación dos atrasos que han de satisfacer deben ter en conta que poden fraccionalos ata en 12 meses (en 24 se houbese contías superiores a 3.000 euros), sempre e cando non existan débedas tributarias pendentes.

A solicitude de fraccionamento hai que presentala antes do 15 de setembro acudindo ao Concello ou directamente ás delegacións de recadación da Deputación da Coruña, unha situada no barrio ferrolán de Esteiro -rúa Naturalista López Seoane 5-7, xusto por detrás de Mapfre- e outra en Narón -no edificio do antigo Concello, en Xubia-. En Ferrol atenden de 9 a 14 horas de luns a venres mentres que en Narón só os luns mércores e venres. Nestas oficinas, ademais de recoller as solicitudes de fraccionamento, tamén nos axudarán a cubrilas se temos dúbidas. Cómpre atenderlle ao prazo do 15 de setembro, posto que despois desa data poderá solicitarse igualmente o fraccionamento aínda que xa cun 10% de recargo sobre a contía orixinal.

Acudir ao Concello ou ás oficinas de recadación máis próximas queda á elección dos usuarios e usuarias. Con todo hai dous casos diferenzados que determinan se é máis conveniente ir a un lado ou a outro. Así, no caso do pagamento de atrasos directamente polas persoas debedoras o trámite pode facerse no rexistro municipal sen maior problema. Porén, cando se trate de pagamentos en que unha persoa actúe como representante -no caso de varios herdeiros, por exemplo- é máis aconsellable facer a xestión nas oficinas de recadación provincial.

Desde o Concello infórmase en relación co Imposto de Bens Inmobles que os recibos de 2015 se pasarán ao cobro entre outubro e novembro xa cos prezos actualizados

28 de xullo de 2015 | 19:06 • Sen comentarios

Comentarios pechados.