O Circuíto Atlántico de Cruceiros estreita lazos entre Galicia e Portugal

O próximo 20 de xuño darase o pistoletazo de saída, en Vila Nova de Gaia (Portugal), á terceira edición do Circuíto Atlántico de Cruceiros coa celebración da Mateus Rosé Sailing Cup, organizada por BBDouro. Será a primeira das tres probas programadas nunha competición que foi creada fai tres anos polo Monte Real Club de Iates de Baiona, BBDouro e o Clube Naval de Cascais, co obxectivo de estreitar, a través da vela, as relacións deportivas, turísticas e culturais existentes entre Galicia e Portugal.       

Unha vez finalizada a Mateus Rosé Sailing Cup, a segunda cita no calendario do circuíto será o Cascais Vela 2015, organizado polo Clube Naval de Cascais. A cita será do 28 ao 30 de agosto. O Trofeo Príncipe de Asturias, do Monte Real Club de Iates, é a última das probas puntuables. Celebrarase do 4 ao 6 de setembro na vila de Baiona, onde tamén se fará entrega, á tripulación gañadora, do copón de prata que simboliza a vitoria na competición. O club vencedor será o encargado de custodiar o trofeo ata a seguinte edición, cando se volverá a pór en xogo.