Povisa ofrecerá o seu servizo de hospitalización a domicilio a pacientes de Val Miñor

A partir do próximo 15 de decembro o Hospital Povisa de Vigo iniciará a ampliación progresiva da cobertura do seu servizo de hospitalización a domicilio, que estará “plenamente operativo” a finais de xaneiro para dar servizo aos máis de 35.000 veciños da bisbarra de Val Miñor.

O obxectivo das unidades de Hospitalización a Domicilio é ofrecer aos pacientes ingresados “unha alternativa” á hospitalización, de forma que poidan recibir atención sanitaria e tratamento nos seus propios domicilios.

A través deste servizo, os equipos sanitarios realizarán entre dous e tres visitas semanais aos pacientes nas súas vivendas localizadas nos concellos de Baiona, Nigrán e Gondomar, onde controlarán os seus síntomas, lles administrarán medicación e lles procurarán acompañamento psicolóxico.

Para iso, un equipo composto por un médico e dúas enfermeiras da unidade de Hospitalización de Povisa en colaboración cos profesionais dos centros de saúde da área acudirán ás casas dos pacientes de luns a venres de 9,00 a 21,00 horas e os sábados de 9,00 15,00 horas.

Tal e como trasladou o Sergas, con este servizo mellórase de forma importante a calidade asistencial ofertada”, posto que os usuarios poden acceder a prestacións sanitarias especializadas nos seus propios domicilios.