O Arcebispado de Santiago mostra a súa consternación polo asalto en Padrón

O Arcebispado de Santiago expresou este luns a súa “consternación” polo asalto á casa reitoral de Padrón (A Coruña), no que morreu a asistenta e o cura resultou ferido, e espera que os autores sexan postos a disposición xudicial.

Así o sinalaron fontes do Arcebispado compostelán, que manifestaron que están “entristecidos e alarmados” polo suceso.

Por iso, ademais de trasladar o seu pésame á familia da muller falecida no asalto, expresaron o seu rexeitamento ao ocorrido na noite do domingo na casa reitoral, que cualificaron de “lamentable”.

Neste sentido, o Arcebispado de Santiago desexa que as forzas de seguridade “aclaren” o sucedido e “os autores sexan postos a disposición xudicial”.

FEITOS

Foron varios individuos os que asaltaron o domingo pola noite a casa parroquial de Cruces, no municipio coruñés de Padrón, e golpearon e amordazaron ao párroco e á súa asistenta, que faleceu no ataque por causas que se investigan.

Os feitos, que investiga a Garda Civil, sucederon sobre as 21.00 horas do domingo. Ademais, ao lugar acudiron un médico da PAC da zona e unha ambulancia asistencial, que levou ao cura ferido, R.B.C., de 78 anos, ao Hospital Clínico de Santiago.