Mos aprobará no pleno a delegación da xestión da taxa do lixo na Deputación de Pontevedra

O Concello de Mos leva a aprobación no Pleno ordinario desta tarde a delegación na Deputación Provincial de Pontevedra das facultades de xestión, inspección, liquidación, recadación e revisión da taxa por recollida de lixo. O día 1 de xaneiro do vindeiro ano 2015 farase efectivo o traspaso do servizo e entrará en vigor o mesmo a cargo da administración provincial, segundo explica a alcaldesa mosense, Nidia Arévalo.

Pola súa banda a concelleira de Medio Ambiente mosense, Julia Loureiro, informa de que coa implantación en Mos do Servizo Provincial de Residuos da Deputación de Pontevedra, “esta encargarase directamente da recollida e tratamento de lixo; o que conlevará importantes beneficios para os veciños e veciñas de Mos”.

A edil responsable do servizo municipal de recollida de lixo apunta que “no 2012 o déficit que dito servizo xeraba era de entre o 30% e o 40%, e que, a pesar de que no ano 2013 se reduciu este déficit coa subida da taxa do lixo, en 2014 o déficit continúa aínda e está cifrado en 100.000 euros anuais, pero este desaparecerá por fin a comezos do ano 2015 coa entrada en vigor do convenio coa Deputación para a xestión dos residuos en Mos”. A entrada en vigor do convenio producirase a principios do 2015 porque é cando vence o contrato do Concello coa empresa concesionaria que actualmente presta este servizo.

Deste xeito, o servizo provincial beneficiará ó Concello de Mos en que se eliminará o mencionado déficit e se mellorará o servizo ó cidadán, entre outros aspectos, ampliando durante a tempada estival a frecuencia das recollidas. Ademais os veciños e veciñas de Mos non terán que volver a asumir unha suba do importe da taxa do lixo.

Con este servizo provincial a Deputación non só se fai cargo da recollida dos residuos ordinarios, senón tamén do papel e cartón, vidro, aceite usado e xestión do punto limpo. Tan só a xestión do punto limpo situado no PEMOS-Veigadaña cústalle a administración local mosense 18.000 euros anuais.

En total, na actualidade, o servizo de recollida e xestión de residuos no Concello de Mos custa anualmente preto de 900.000 euros; feito que deixará de ser así a partir de 2015. Como se dixo, evitando a xestión directa na recollida de lixo do Concello de Mos, o municipio logrará un servizo de recollida de lizo máis económico e eficaz, que contribúa ó equilibrio financeiro das arcas municipais, xa que implicará o pago semestral do servizo que será practicamente igual para todas as localidades pontevedresas adheridas a este Servizo Provincial de Residuos.

A Ordenanza Provincial Reguladora da Taxa pola Prestación do Servizo de Recollida de Lixo regulará, dentro do ámbito das competencias municipais delegadas polo Concello de Mos, os aspectos relativos aos residuos sólidos urbanos, tanto dende o punto de vista dos usuarios do servizo coma da xestión e prestación do servizo de recollida.

Este servizo de xestión de residuos que terá ámbito provincial, comprenderá a recollida, transporte, tratamento e eliminación de desperdicios; establecéndose, así mesmo, liñas de actuación que fomenten a redución, reutilización e reciclado dos mesmos.

Os aforros virán dados tanto pola mellor estruturación e planificación do servizo e, en consecuencia, pola redución dos medios humanos e materiais necesarios para a súa prestación, como pola mellora no sistema de xestión.