Begoña Estévez recibe a Luis Fernández Pereira tras converterse no primeiro medallista galego da historia en piragüismo de slalom

Begoña Estévez no encontro co medallista Luis Fernández

A deputada Begoña Estévez recibiu hoxe oficialmente a Luis Fernández Pereira, piragüista de Entienza (Salceda de Caselas) pertencente ó Club Piragüismo Penedo de Tui, que acaba de ser o primeiro piragüista galego da historia que acada unha medalla na modalidade de slalom trala proba do Campionato Mundial Xuvenil sub 23 que se celebrou en Australia.

Luis Fernández estivo acompañado por representantes do seu club e do Concello de Salceda. Na recepción, Begoña Estévez destacou “os altísimos méritos dun rapaz que, a base dun esforzo extraordinario tanto del como da súa familia, neste seu primeiro ano de xuvenil, obtivo a primeira medalla da historia de Galicia nun campionato mundial de piragüismo en slalom, que foi seleccionado para o campionato de Europa de Macedonia e que gañou todas as competicións en C1 xuvenil na Liga Nacional”.

Begoña Estévez destacou o carácter exemplar do deportista de Salceda de Caselas e afirmou que a Deputación de Pontevedra colaborou con el para o desprazamento a Australia e para a compra de material deportivo “e, sen dúbida, en vista da súa traxectoria, da súa persoalidade e dos seus éxitos, colaboraremos máis no futuro”.

Luis Fernández Pereira disputou e acadou a medalla de bronce no Campionato Mundial de Slalom en Penrith (Australia), logo dunha brillante participación nas catro probas de clasificación que tiveron lugar en La Seo de Urgell (Lleida) e Orthez (Francia).