Vigo acollerá Talentum Schools para fomentar vocacións dixitais entre cativos e adolescentes

Talentum Schools, o novo programa educativo de Telefónica para promover o desenvolvemento de vocacións dixitais, arrinca mañá en Vigo co obxectivo de achegar o mundo da tecnoloxía e as súas utilidades a nenos e adolescentes de entre 5 e 18 anos.
 
Cunha formulación totalmente lúdica e a través dun completo programa de talleres prácticos guiados por mentores de Telefónica, a iniciativa trata de espertar e fomentar a paixón dos máis novos polas novas tecnoloxías.
 
Os cursos, de carácter gratuíto, desenvolveranse na  tenda Movistar situada en Gran Vía nº 15, e permitirán aos asistentes adquirir conceptos de programación, realidade aumentada ou para a creación de aplicacións móbiles. Preténdese así conseguir que, desde idades moi temperás, os máis pequenos se convertan en produtores de bens dixitais e non só en consumidores, ao mesmo tempo que desenvolven habilidades relacionadas co pensamento creativo e a resolución de problemas a través da experimentación.
 
A experiencia, que levará a cabo ao longo de todo o ano, comezará este mes con talleres que se impartirán todos os  venres, de 18:00 h. a 19:30 h., e os sábados, de 10:00 h. a 13:30 h. En xullo celebraranse, con todo, de luns a xoves, tamén en horario de 18:00 h. a 19:30 h. Tras un descanso en agosto, Talentum Schools retomará a súa actividade en setembro, co inicio do novo curso escolar.
 
As persoas interesadas en participar poden consultar toda a información sobre o programa ou reservar praza en www.talentumschools.com. 
 
Éxito de participación
 
Desde a súa posta en funcionamento en 2013, Talentum Schools desenvolveuse xa cun notable éxito noutras cidades españolas como Madrid, Barcelona, Sevilla, Bilbao, Valencia, Palma de Mallorca, Zaragoza ou Selecta. Durante este mes, estenderase a outro dez cidades, e seguirá ampliando o número de aquí a final de ano.
 
Para o deseño do programa, Telefónica contou coa colaboración de Samsung, Qualcomm, SK Telecom e as universidades de Florida e de Central Florida.
 
Talleres programados
 
Dirixido a mozos de 7 a 12 anos:
 
Aprende a programar:
Curso de introdución a Scratch, tecnoloxía open source desenvolvida polo MIT –Massachuset Institute of Technology-, coa que aprenderán a crear cómics animados e desenvolver historias, xogos e animacións, ademais da compartilas.
 
Dirixidos a mozos a partir de 12 anos :
 
Desenvolvemento de Apps:
Desenvolverán as súas propias aplicacións para móbiles coa tecnoloxía de software libre App Inventor, creada polo MIT.
 
Dirixidos a nenos de 5 a 8 anos:
 
Xoga coa realidade aumentada:
Os máis pequenos adquirirán conceptos básicos de realidade aumentada a través dun xogo baseado na tecnoloxía Vuforia de Qualcomm, que lles permitirá crear as súas propias historias utilizando divertidos personaxes.
 
Aprende con Lightbot:
Adquirirán conceptos básicos de programación a través do xogo.